Sunday, July 31, 2005



شكر الله سعيكم


كتب:
حامد


استكمالاً لمسيرة الديموقراطية و الحرية و الرفاهية إلخ إلخ ، قرر بابا مبارك (طويل العمر يطول عمره وينصره على مين يعاديه هاي هي) ومن مدرسة المساعي المشكورة ترشيح نفسه ليحكمنا لست سنوات أخرى ، و أنا شخصياً من أشد أبناء باب مبارك حباً و تقديراً له ، لدرجة أنني أتمنى من أعماق معاميق قلبي أن يوافق طويل العمر على أن يستنسخ من نفسه 10000 نسخة نخزنها لوقت الحاجة ، أو حتى نرسلها كهدايا لأشقائنا العرب و العجم لكي يذوقوا طعم الحرية و الديموقراطية التي حرموا منها و التي نعيش في نعيمها منذ 24 عاما ً !!


بعيداً عن انتخابات 7/9 التي لن تشارك فيها للأغلب لأنك ليس عندك بطاقة انتخابية ، و بعيداً عن ال12 مرشح الذين لم نسمع عنهم و لا عن أحزابهم من قبل ، بعيداً عن كل ذلك ، لو كان الأمر بيدك ، من الشخصية التي كنت تتمنى لو أصبحت رئيساً لجمهوريتنا ؟؟



37 Comments:

At 11:52 AM, Blogger Haitham said...

وبعيد عن الحماس الزايد ..فعلا مفيش غير مبارك ينفع-من المرشحين- ممكن أكون باقول كده عشان ماشفتش غيره بس المرة دى طلعت فشنك..لكن انتحابات 2011 هتكون جامدة بجد..وعموما الحل في السي أر

 
At 4:27 PM, Anonymous مريم said...

أنا شايفة ان أيمن نور هو أحسن الحلول دلوقتي ببساطة لأن برنامجه الانتخابي بالفعل معتمد على مرحلة انتقالية لمدة سنتين يتم فيهم تعديل الدستور بجد ثم عمل انتخابات في 2007
وبعدين أنا مش عايزة النبرة الانهزامية تسود ، بمعنى اني عارفة ان نور مش المرشح المثالي و ان الانتخابات مش هتبقى نزيهة و لا حاجة و ان كمان معظمنا ماعندوش بطاقات انتخابية خاصة عشان قاطعنا استفتاء تعديل الدستور...و برغم كل دا أنا ناوية أروح أسأل على بطاقتي و أدفع كمان العشرين جنيه غرامة اللي قالوا عليهم عشان ما اشتركتش في الاستفتاء...كل دا بالعند عشان بس انتخب أيمن نور
أنا مش منتمية لحزب الغد ولا أي حزب تاني بس لازم الانتخابات دي ماتعديش بالساهل و لازم بجد ننزل ندي صوتنا لبرنامج أيمن نور-مش لازم هو بعينه كشخص- عشان العالم يعرف ان هو دا البرنامج اللي مصر عايزاه و النظام كمان يعرف ان زمن اللزق ع القفا انتهى خلاص وان الفترة الجاية مش تعدي هي كمان بالسهولة دي و ان الشعب عارف كويس يفرق بين المرشحين الديكور و المرشحين اللي واخدين الحكاية جد و عايزين يفوزوا

 
At 10:35 PM, Blogger shady said...

اى واحد حرامى بس يكون حرامى معلم اذاى
يعنى يسرق ويسيب البلدماشيه علشان يلاقى حاجه يسرقها بكره وهكذا مش حرامى حمار يخربها خالص ويشفطها ويبيع كل اللى فيها ويقعد حاطط ايده على خده

 
At 7:26 AM, Blogger محمد هشام عبيه said...

وأنا مع مريم..أيوة هأروح وارخم على أهاليهم ..وأنا بأحط صوتي يوميها هأوريهم أني بأعطي لأيمن نور..فعلا أيمن نور مش المرشح المثالي ..ومش هو الرئيس اللي كلنا عاوزينه ..وأنا عارف أنه مش هينجح ..بس اختياره هيحمل دلالة ما..ووسيلة عملية لرفض مبارك..ربما أكون متفائلا أو حتى عبيطا بس أعتقد أن المشاركة في الانتخابات الرئاسية بإيجابية أفضل كتير من الجلوس في البيت ومصمصة الشفافيف وخلاص..

 
At 8:51 AM, Blogger Hamed said...

يعني مريم و هشام مش هيرشحوا بابا مبارك و شايفين أن أيمن نور مش هو المرشح المثالي بس أهو أحسن الوحشين وخلاص ،وبعدين يا مريم موضوع السنتين بتاع أيمن نور ده حاجة صعب إن الواحد يتأكد منها ، ممكن بعد سنتين يحصل تفجير أو أي مصيبة وساعتها هيبقى صعب إن نور يسيب البلد في الظروف الحرجة و الأوضاع الراهنة التي تمر بها المنطقة ... إلى آخر الكلام الكبير ده، ولو تناسينا تاريخ أيمن نور المجهول اللي محدش يعرف عنه حاجة ،فأنا بسأل عن الرئيس اللي احنا بنحلم بيه بجد ، واحد كويس فعلاً مش مجرد أحسن الوحشين ، حتى لو مكانش من المرشحين للرئاسة .. يا ترى مين ؟؟

 
At 8:54 AM, Blogger Hamed said...

ممكن يكون كلامك صحيح يا هيثم ، إن مبارك أكتر واحد من المرشحين عارف البلد و العالم ، راجل خبرة من الآخر ، بس السؤال برده لسة مطروح ، مين بعد مبارك ؟؟ إنته كمواطن مصري بتحلم بمين يكون رئيس جمهوريتك ؟؟

 
At 8:57 AM, Blogger Ghada said...

قعدت أتابع المرشحين للرئاسة بحالة من حالات الكوميديا السوداء .. صباح الجهل وعدم الاحساس بخطورة منصب رئيس الجمهورية اللي إحنا فيه ..

والله أنا كنت فاكرة إن الكلام المكتوب ده نكت .. بس المصيبة إنه طلع بجد ..

فوزي غزال .. حزب مصر 2000:
مش عاوز يحدد النسل عشان دي خطة صهيونية لتدمير العرب!

محمد عبد العظيم الصاوي .. مش فاكره تبع إيه:
هيمنع الفتيات من الظهور في الاعلانات حتى لا يفتنوا الشباب!

أحمد الصباحي .. رئيس حزب الأمة:
عاوزنا كلنا نلبس زي موحد!

صباح التهييس .. مع احترامي .. حسسوني إني ساكنة في زنزبار .. وإن الحياة بمبي بمبي .. وإن معندناش مشاكل غير في الخلفة وغير في إن الشعب لابس زي مخالف!! لا عجب من إننا لسة واقفين عند ال7000 سنة حضارة..

باضم صوتي لمريم ومحمد .. وأهو ضل أيمن نور ولا ضل ....

 
At 8:58 AM, Blogger Hamed said...

ليك حق تقول كده طبعاً ياشادي ، عشان العربي الناصري مقاطع الانتخابات ، بس ياترى ده هيكون رأيك برده لو كان فيه مرشح ناصري ؟ ولا لو مكنش المرشح ناصري يبقى لازم يكون حرامي وابن ستين في سبعين ..

 
At 9:24 AM, Blogger Doaa Samir said...

عودة الابن الضال
مش عايزة أكرر الكلام بس أنا مع مريم، مع إني لو جيت عند أكثر الخطوط أمناً هلاقي إن مبارك واحد برضه ليه خبرته،أيا كان لونها ووصفها، لكن في نفس الوقت الواحد زهق من رتابة حياتنا وأوضاعنا.. لأ دي ياريتها رتابة وفقط,,, دي الأمور تزداد سوءا. الواحد نفسه في تغيير حتى لو كان ضئيلا. وأيمن نور، بصراحة هو اللي نعرف عنه القليل، أحسن من اللي ما نعرفش حاجة عنهم.. أنا خايفة أقول إننا محتاجين لنوع خاص جدا من الحكم اللي يربينا عشان نبقى أحرار. لأن شوفوا التغيير الطفيف اللي حصل في الدستور ده عمل ايه.. عاملين زي الأطفال اللي لو ضحكت معاهم شوية ممكن يتطاولوا عليك.. هرجلة، دي كلمة توصف اللي حاصل

 
At 12:42 PM, Anonymous مريم said...

احنا فعلا اتحكمنا بصورة بشعة الفترة اللي فاتت دي، و كل ماحد يقول ان الناس كمان عليها عامل مهم و دور زي الحكومة تمام و احنا بنتجاهله أرجع وأفكر وهو مين اللي همش الشعب بالشكل دا و أفقده القدرة على المشاركة؟
بالنسبة لحكاية المرحلة الانتقالية في برنامج نور وان ممكن حاجة تحصل في السنتين دول...احنا منقدرش طبعا نعرف الغيب أو نعمل حساب كل حاجة بس أنا مقتنعة ان لو قدرنا ننهي حكم مبارك و النظام الحالي و جبنا نور أو أي حد تاني مش هيقدر أبدا يتخلى عن برنامجه أو يضحك على الناس بالكلام بتاع الظروف الصعبة اللي بتحتم عليه البقاء
مصر في مرحلة مهمة وأي مكسب الناس هتقدر تحققه بعد 25 سنة من الحكم البشع دا محدش هيقدر يحرمهم منه تاني
حتى لو مبارك زور و كسب البلد مش هتسكت تاني
seekingfreedom

 
At 4:21 PM, Blogger Hamed said...

معاكي يادعاء إننا زهقنا وعاوزين نغير ونشم هوا جديد ونضيف ، بس الموضوع مش كوتش هنرميه وننزل أديدس نجيب واحد جديد ..
احنا كلنا ملناش انتماء لأي حزب أو فكر ، يعني باختصار نحلم براحتنا ، إيه رايكم مثلاً في عمرو موسى ، أو في ابو غزالة أو حتى في عمر سليمان .. أعتقد إن البلد فيها ناس ينفعوا .. ولا مش معايا ؟؟

 
At 4:32 PM, Blogger Hamed said...

عاجبني حماسك يا مريم ، بس مش عارف ليه حاسس إنك واثقة في الشعب بتاعنا أكتر من اللازم .. أنارأيي الخاص إن الشعب هيسكت مهما حصل ، لو الانتخابات اتزورت كالمعتاد يعني ، كل اللي هيحصل مظاهرات مظاهرات ممكن تطول شوية ، وبعد كده ...
أنا برده بقول تاني : خلينا نحلم برئيس جمهورية يناسبنا حتى لو مكانش من المرشحين ، من كل الشخصيات العامة اللي حواليكي مش شايفة واحد ينفع رئيس جمهورية ؟؟

 
At 7:40 AM, Anonymous مريم said...

فكرت قبل كده في حمدي قنديل لأنه محترم مثقف مؤمن بالديمقراطية و أهم شئ ان الناس البسطاء عارفينه كويس و بيحبوه كمان

 
At 7:48 AM, Blogger Hamed said...

كويس قوي يا مريم .. ابتدينا نقول اللي جوانا و اللي بنحلم بيه أهو ، مين تاني يا مريم غير حمدي قنديل ؟؟

 
At 4:28 PM, Anonymous مريم said...

الأسماء كتير يا حامد، فيه مدون كان عمل قائمة كبيرة جدا بيهم هاطلب منه انه يكتبها هنا

المشكلة اني حاسة ان احنا داخلين بالفعل على معركة حقيقية بغض النظر عن اللي بنحلم بيه -و هو كتير جدا لأنه الأحلام المحبوسة ل20 سنة على الأقل-هي طبعا معركة زيفها مخطط الحكومة و بقيت مسرحية هزلية..بس هل هتقدر المعارضة تكسب نقط فيها ولا لأ و احنا كمان هيبقى دورنا ايه

 
At 1:41 AM, Blogger محمد هشام عبيه said...

معلهش ياحامد باشا..بس سوري يعني..غيه اللي يخلينا نختار عمرو موسى..عشان بق وحنجوري وبس..عمل إيه عمرو موسى لجامعة الدول العربية ..ولاحتى لمصر لما كان وزير خارجية ..هو وجيه قوي وكاريزما بس كله في الهوا..
أبوغزالة ..ماشي محترم وفل الفل..بس يعني البلد مفهيش إلا عسكر ..طبعا الكلام ينطبق على عمر سليمان والأخير من رجال مبارك فأكيد حاشية مبارك هتحوطه..
البلد محتاجة دم جديد ونظيف..وابوس إيديكوا بلاش حكاية أن مبارك خبرة ومفيش زيه في التعامل مع العالم الخارجي..طبيعي أن واحد بقاله 24 سنة يبقى خبرة ..وبعدين ريجان ولا بوش وكلينتون كانت خبرتهم إيه قلب مايبقوا رؤساء لأكبر دولة في العالم- مع التحفظ على أداء كل واحد فيهم - بس هناك يوجد مايسمى بصناعة الرئيس ..خبراء في كل مجال ومساعدين بيكونوا جنبه..مش بيقول في كل حاجة ويتكلم في كل فليم..أنت محتاج الأول تصنع دوائر لصنع القرار حول الرئيس بعدها أي واحد محتمر- دون الحاجة لخبرة 24 سنة- سيكون رئيس جمهورية محترم..

 
At 3:59 AM, Blogger Tamer said...

مصر مليانة ناس كويسة تحكم بضمير , و لو انا اللي باختار أختار محمد حسنين هيكل لأني شايفه الاصلح في الفترة دي لوضع دستور و رؤية جديدة للبلد و عموما كل دي اسامي تنفع و مافيهاش ولا اسم فيه مبارك.

د. أحمد هيكل وزير الثقافة الاسبق. د. أحمد عكاشة رئيس الجمعية العالمية للطب النفسي، ود. أحمد مستجير عالم الهندسة الوراثية، د. أحمد الغندور استاذ الاقتصاد الدولي،
د. ثروت عكاشة وزير الثقافة الأسبق، حسب الله الكفراوي وزير الاسكان الأسبق، د. حازم الببلاوي خبير اقتصادي، د. سميحة القليوبي استاذ القانون التجاري، المستشار يحيي الرفاعي، المستشار جابر ريحان المدعي العام الاشتراكي السابق، منصور حسن وزير ثقافة وإعلام سابق ، د. يوسف قاسم استاذ الشريعة الإسلامية بحقوق القاهرة، د. عبدالعظيم أنيس مفكر واستاذ جامعي سابق، د. ميلاد حنا خبير اسكان، د. رشدي سعيد عالم واستاذ الجيولوجيا، د. قدري حفني استاذ الاجتماع السياسي، د. إبراهيم درويش الفقيه الدستوري، د. جلال أمين مفكر ليبرالي واستاذ بالجامعة الامريكية، ود. عبدالعزيز حمودة عميد آداب القاهرة السابق، د. نجيب الهلالي رئيس جامعة القاهرة السابق. د. علي عبدالرحمن الرئيس الحالي لجامعة القاهرة، المستشار طارق البشري مفكر سياسي، فهمي هويدي كاتب سياسي، أمين هويدي رئيس جهاز المخابرات الأسبق، د. أحمد جويلي وزير التموين الاسبق، المستشار عبدالعزيز الجندي النائب العام الأسبق، سكينة فؤاد كاتبة صحفية، د. يحيي الرخاوي خبير الطب النفسي، د. يونان لبيبب رزق مؤرخ. د. محمود أبوالعيون المحافظ السابق للبنك المركزي، المهندس علي والي وزير البترول الاسبق، د. وحيد محمود الرئيس الاسبق لمحكمة الاستئناف، اللواء أحمد عبدالرحمن الرئيس الأسبق لهيئة الرقابة الادارية، د. هدي وصفي استاذ الأدب الفرنسي بجامعة عين شمس ، د.عصمت عبدالمجيد الامين العام السابق للجامعة العربية، كامل زهيري نقيب الصحفيين الاسبق، سلامة أحمد سلامة كاتب صحفي، صلاح حافظ كاتب صحفي، اسامة أنور عكاشة كاتب وأديب، فاروق جويدة شاعر ومثقف، د. عبدالعظيم انيس مفكر واستاذ جامعي سابق.

السؤال اللي عندي للي بيقولوا مبارك هو الاصلح: لو مات مبارك (امين) مصر هتنتهي؟ و ايه اسوأ من كده ممكن يحصل لو أيمن نور او غيره حكم البلد؟؟؟؟؟
و ايه أحسن ممكن يحصل؟؟؟؟

 
At 4:56 AM, Blogger Hamed said...

إيه اللي يخلينا ننتخب عمرو موسى ؟ ده كلام برده ياهشام .. كفاية ياأخي إن شعبولا ضمير الشعب عملة أغنية !
وبعدين خلينا نتكلم بصراحة ، لا عمرو موسى ولا غيره ممكن يعملوا أي حاجة في جامعة الدول العربية ، الميثاق بتاعها أصلاً مايسمحش لأي حد إنه يعمل أي حاجة ، مجرد كيان صوري كده ..
على أية حال أنا مبقولش ننتخب عمرو موسى .. أنا بفتح مواضيع مش أكتر ..
شكلك مخنوق قوي من حكم العسكريتاريا ، وده حقك و حقنا الحقيقة ..دول أكتر من 50 سنة .. ارحمونا يعني ..
خلي بالك برده من نقطة إن الوضع هنا مختلف عن الوضع في أمريكا ، أقصد منظومة الحكم ككل ، كفاية إن الرئيس هناك مش ملهم ولا زعيم مفدى وبينفذ برنامج مدروس عاملينه خبراء بجد مش قاعد في غرزة يحشش واللي ييجي على باله يروح عامله ..
بس برده مقلتليش من هوة الرئيس اللي بتحلم بيه ؟؟

 
At 5:19 AM, Blogger Hamed said...

يااه يا تامر .. كل دول شايفهم ينفعوا رؤساء جمهورية .. بلدنا ولادة فعلاً ..
الحقيقة قايمة الأسماء بتاعتك تخلينا نفكر في إجابةلسؤالين مهمين جداً ..
أولا : هل المثقف ممكن يبقى حاكم ؟ ممكن المثقف يحكم ويبقى رئيس جمهورية ؟ ولا إحنا بنجري ورا نموذج اليتوبيا و بنحاول نحقق المدينة الفاضلة وخلاص ..
ثانياً : لفت نظري جداً اختلاف الانتماءات السياسية للأسماء بتاعتك .. وده يخلينا مفكر .. هل من مصلحة البلد إنه يحكمها حاكم له أيدولوجية ؟ إنه يكون ليبرالي أو قومي أو يساري أو إسلامي ، يمكن الميزة أو العيب في الحكام العسكريين إنهم مش مسيسين ، يعني ملهمش توجه سياسي معين ، مقضينها كده وخلاص يعني .. يا ريت لو حد شايف إن فيه أيدولوجية للحزب الوطني يبقى يقوللي ..
محدش قال رأيه صحيح في أسامة الباز أو مصطفى عبد الغني .. ولا عشان من حاشية الرئيس ..

 
At 7:59 AM, Blogger Tamer said...

أنا في رأيي يا حامد إن المثقف ينفع جدا في المرحلة دي لأن البلد في حالة من التأخر لم تصل إليها من قبل و لو إن مش كل القاتمة تصنف مثقفين.
و أنا رأيي انه مش عيب إن يكون للإنسان إيديولوجية طالما هيحترم الاختلاف, ة عموما مافيش إنسان من غير إيديولوجية فكرية بشكل او بآخر.
المهم إن في بدائل كتبر لكن هما مش عايزينا نشوف غير اللي شاف منام واللي عاير يلبسنا طرابيش عشان نسلم إن مبارك هو الحل, لكن في حلول كنير اقل واحد فيهم أحسن من المعلم.

 
At 10:01 AM, Blogger ibn_abdel_aziz said...

في الحقيقة
لا احد يصلح ان يكون رئيس مصر الان
لانهم كلهم مصابون بنفس الامراض

كنت ممكن اقول عمرو موسي مش عشان شئ الا عشان ان لو سالت اي حد في الشارع حيقوللك هو انسب انسان وانا احب ان استمع للناس العاديين اولا

لكن لو اردتم شخص حقيقي يصلح رئيسا لمصر يجب ان يكون شخص ليس خريج ثقافة الديكتاتورية
ولا اعلم اين يوجد هذا الشخص الان الا اني متاكد ان واجبنا اننا نخلق الجيل اللي حيفرز الشخص ده ف يوم من الايام

قد يكون واحد منكم
او قد يكون شخص اخر
المهم انه يؤمن بانه ليس مقدسا ولا ملهما ولا رسول العناية الالهية وانه ليس ابو مصر ولا ام مصر ولا اخوها ولا اختها وانه يفهم ان انسان لا يجد قوت يومه هو شغله الشاغل

 
At 1:46 PM, Anonymous مريم said...

أنا متفقة تماما مع تامر بالنسبة لرأيه في المثقف و أصحاب الأيديولجيات المختلفة

الثقافة ضد الجهل و عموما مفروض فيها توسيع أفق الانسان و احنا محتاجين حد يقدر يحترم و يتقبل الاختلاف و التعددية الموجودة في مصر حاليا ويعتبرها ظاهرة صحية
غير اللي حاصل دلوقتي لأن النظام بيربي الناس على انها تكون نمطية ونسخ من بعض تفكيرها منحصر في الأمور الصغيرة و بس عشان يقدر يتحكم فيها باعلام موجه

 
At 5:32 PM, Blogger Hamed said...

لأ يا ابن عبد العزيز .. أنا مش معاك ..
معقولة مصر ده كلها التمانين مليون شخص و السبعتلاف سنة حضارة (بقيت بتكلم زي بتوع الحزب الوطني!) معقولة ميكونشي فيهاولا واحد محترم ؟؟
أكيد فيه .. حتى ولو مش شخصية معروفة .. بس أكيد فيه ..
إيه رأيك تبص للشخصيات اللي حواليك وتفكر معانا .. مين ينفع بعد مبارك ؟؟

 
At 5:43 PM, Blogger Hamed said...

أيوة .. هوة ده مربط الفرس يا تامر و يا مريم .. إن الحاكم صاحب الأيدولوجية يكون بيحترم الاختلاف ..
وخلينا نتكلم بصراحة برده ، آفة أغلبية المثقفين من اليمين لليسار حاجة بسميها (البرشطة الفكرية) .. كل واحد بيحاول يقنع اللي حواليه بفكره .. ده مش عيب طبعاً طول ما الموضوع متكافئ .. يعني اتنين بيتناقشوا مثلاً .. بس لما يكون الموضوع مش متكافئ زي إن دولة بكل إمكانياتها وآلياتها تكون بتفرض فكرها على مواطنيها ، فده يبقى غسيل مخ .. ولا إنتم شايفين إيه ؟؟

 
At 5:47 PM, Blogger Hamed said...

محدش علّق على أسامة الباز أو مصطفى عبد الغني .. طب إيه رأيكم في عمرو خالد ؟؟

 
At 5:47 PM, Blogger Tamer said...

ابن عبد العزيز: في الحقيقة لا احد يصلح ان يكون رئيس مصر الان لانهم كلهم مصابون بنفس الامراض.
ده كلام خطير و انا باعترض عليه لأن في محترمين كتير قوي.

انا عايز أقول ان مبارك مش حل مبارك استسلام لأمر واقع زي الاستسلام لحقيقة وجود اسرائيل و الاستسلام لحقيقة ان الرشوة امر واقع و الاستسلام ان التلوث و القذارة من صفات القاهرة الاصيلة و الاستسلام لان الكذب و الغش جزء من طباع المصريين و الاستسلام لان الفن الهابط هو مطلب الجماهير و غيره و غيره.........

الاستسلام حل سهل و سريع و مريح..... و هو ده المطلوب بالزبط

 
At 11:51 PM, Blogger محمد هشام عبيه said...

متعقدش أن مصطفى عبد الغني يصلح رئيسا للجمهورية الرجل مثقف محترم وأكاديمي فل الفل بس في الرياسة أظن صعب..ناهيك أنه لايمتلك قاعدة شعبية وغير مشهور إلا في دائرة محدودة جدا
أسامة الباز الجميل أنه دقهلاوي يعني بلدياتي..بس برضة من بطانة النظام الذي لو لم يكن فاسدا فأنه لم يقاوم الفساد..الرجل رغم أنه خبرة في شئون السياسية والرئاسة إلا أنه بقالوه مليون سنة في مكانه ..مكانه اللي معمول عشان الرئيس مش عشان مؤسسة الرئاسة اللي هي واجه مصر..حارم برضة نجيب واحد بقالوه أكتر من ربع قرن موجود في الصورة ونقول له خليك في الصورة ربع قرن كمان ..

 
At 12:18 AM, Blogger Doaa Samir said...

المشكلة يا شباب إن النظام عندنا بقى شخص.. يعني مفيش نظام مستقل ومبني بطريقة الكباري.. أقصد إنه ثابت ومتين وفيه مسافات تسمح له إنه يكون مرن.. والمسألة دي عشان نتغلب عليها عايزين جهد رهيب جدا لأنها نتيجة تراكمية.

والأسباب معروفة، زي ما قلتم إننا شعب غير مسيس حتى بينه وبين نفسه وغير ناضج "مع احترامي لـ د. نظيف" بلادرجة اللي تخليه يقتنع في نظام وفكر وتوجه معين... عايز حاجة من لحم ودم.. فكل اللي بيحصل إنه بيعمل إسقاط على الرئيس أوا لحاكم اللي بيحكم بأي نظام -إن وجد- دي نقطة


النقطة التانية، مش ملاحظين إن كل الأسماء المطروحة كبيرة جداً ويندر لو وجدت فيها دماءً جديدة؟! هل ده يرجع لأن الرموز اقتصرت على المخضرمين وفقط؟ أم هل لأن الشباب النشطين لا يجدون الفرصة والإضاءة المناسبة ليتحسسوا طريقهم للجموع؟ أم هل لأن الإعلام عندنا موجه بطريقة مقصودة بحيث أن حتى الاحتمالات لا تكون إلا كما يرغبون؟!د

أنا بارجع لكلام محمد هشام وأتسائل زيه: هو كلينتون وبوش وريجان "اللي بدأ في هوليوود" وغيرهم,, كانت خبرتهم ايه في الحياة السياسية ودهاليزها؟! والواحد لما بيخص بالذكر رؤساء أمريكان باعتبار -بلا شك- أن أمريكا دولة عظمى جدا.

احنا محتاجين جرأة حتى في طرح الاحتمالات ... وليه لأ، يمكن تطلع للنور..

 
At 2:06 AM, Blogger Hamed said...

هوة ده اللي بتكلم عليه ياهشام ، المثقف ينفع يبقى حاكم ولا لأ .. مصطفى عبد الغني مثقف ودماغ وكل حاجة ، بس الرئاسة صعب .. ليه صعب ؟ وبالنسبة للقاعدة الشعبية ، مفيش اي مرشح من المعروفين أو المجهولين له قاعدة شعبية ، واللي ليهم قاعدة شعبية هيبقى عشان كاريزمتهم مش أكتر ، زي عمرو موسى كده ..
أسامة الباز فعلاً بقالوا 5000 سنة جنب الرئيس .. إظاهر إنه كفاءة نادرة !
أنا هقولوكم على الحل السحري .. إيه رأيكم في كمال الشاذلي ؟ رمز الديموقراطية المصرية و أقدم برلماني في العالم ..

 
At 2:22 AM, Blogger Hamed said...

المشكلة إن النظام بقى شخص ؟ النظام طول عمره عندنا شخص واحد بس يادعاء .. الرئيس هنا مش مدير المنظومة ، لأ ..هوة النظام و المنظومة ، هوة الوطن و المواطن و هوة كل حاجة ..
وهي ده المأساه اللي هتخلينا طول عمرنا نقول لا زعيم إلا الزعيم ..نموت نموت ويحيا الزعيم ..
مقولتيش مين يا دعاء الشخص اللي بتحلمي يبقى رئيس الجمهورية ؟؟

 
At 10:29 AM, Blogger Romantic Rose said...

عجبني قوي الموضوع و قريت كل التعليقات ..
عمرو خالد من وجهه نظري شخص ممتاز و مع حب اغلب الشباب له و فكره المستنير و احترامه لجميع الكوادر و الاختلافات الفكريه اعتقد انه هيقدر يتعامل بمنتهي الهدوء في السياسه الخارجيه و الداخليه و هيلاقي الموارد اللي يمول بيها مشروعاته اللي ان شاء الله هتضمن مستقبل احسن ..
هو ليه ما رشحش نفسه .. كان اكيد ترشيحه هيفرق كتير.

 
At 5:25 PM, Blogger shady said...

تسطيح تسطيح تسطيح
الظاهر اننا عايشين فى بلد صفيح

 
At 5:28 PM, Blogger Hamed said...

كويس والله يا روز إن نفسك طويل وقدرتي تقري التلاتين تعليق اللي قبلك كلهم ..
ليه عمرو خالد مرشحش نفسه ؟ يمكن عشان هوة شايف إن الرئاسة والحكم مش رسالته في الحياة ، ويمكن عشان عارف إنه كده كده مستحيل يفوز في الانتخابات ده ، وبالتالي هوة مش عاوز يحرق نفسه ويثبت اللي الحكومة عاوزة تثبته من قديم الأزل ، إن عمرو خالد مش شخص برئ للدرجادي ، وإنه له علاقة بطريقة أو بأخرى ببعبع الحكومة رقم 1 : الإخوان المسلمين ..
ويمكن برده مرداش يرشح نفسه عشان مش هيعرف يجيب ال250 صوت من مجلس الشعب و الشورى و المجالس المحلية اللازمة للمرشح المستقل ..
روز بتحلم بشخص زي عمرو خالد يبقى رئيس جمهوريتنا ، وده جميل جداًبجد .. يا ترى حد له رأي تاني ؟؟

 
At 5:32 PM, Blogger Hamed said...

عزيزي شادي .. كالعادة يائس ومخنوق من الدنيا و اللي فيها .. بصراحة كده ياأبو شادي هتعمل زي العربي الناصري والإخوان وتقاطع الانتخابات و اللا هتدي صوتك لحد ؟

 
At 6:22 AM, Blogger Romantic Rose said...

سؤال علشان انا فاشله شويه ف موضوع السياسه ده .. هما اعضاء مجلس الشعب و الشوري و المجالس المجليه كام علي بعض ؟؟
بسأل علشان احسب حسبه بسيطه كده .. اتقال امبارح ان لحد ما باب الترشيح اتقفل كان فيه 30 مرشح .. يعني جابوا 7500 صوت ؟؟ هل معني كده ان فيه مليون الا ربع مصري ممثل للشعب سواء ف مجالس نيابيه او محليه و مع ذلك ده حال البلد ؟؟

 
At 7:14 AM, Blogger Hamed said...

لأ يا روز .. الموضوع مش كده المرّادي .. الفكرة إن المرشحين من الأحزاب في انتخابات المرادي بس معفيين من موضوع أصوات مجلس الشعب و الشورى و المجالس المحلية ، بينما المرشحين المستقلين لازم يجيبوا عدد 250 اسم .. ليه ؟ يمكن عشان الحكومة عارفة ومتأكدة إن مفيش أي حد في الأحزاب كلها له قاعدة شعبية تخليه ينجح في الانتخابات ، و إن الشعب كله عارف إن مفيش حد في الأحزاب ده كلها يسوى تلاتة تعريفة ، و الشعب أمله بعد ربنا في حد جديد .. حد ميكنش منتمي لحزب أو للحكومة .. الشعب مستني المخلص يا روز ، و الحكومة مش عاوزة المخلص ييجي !!

 
At 6:20 AM, Anonymous Anonymous said...

بدون تشنج انا شايف النظام الحالى بيعمل لمصلحته و ليس لمصلحة الدوله و كل حاجة مسخرة من اجل النظام الحاكم و قد ادى ذلك الى عيوب فى تركيبة الشعب و ان كنت لا الوم الحكومة وحدها لان الشعب منع نفسه من المشاركة وما حاولش يشارك من اجل التغييؤ و الالحاح على مطالبه و نرى ذلك فى انتخابات مجلس الشعب نجد ان الاغنياء ينجحون مع ان الشعب فقير وكأن الاغنياء سيبحثون عن مصالح الفقراء ولكن افضل البرامج المعروضة هو برنامج ايمن نور وانمتا ات
يصدق

HAWWASH1

 

Post a Comment

<< Home