Sunday, July 31, 2005


إحنا ليه مابنتعلمش


كتب: معاذ

عندى احساس ان الشعب المصرى فاقد للذاكرة بشكل غريب
..مش عارف ليه لازم لما تكون فيه صلاة جنازة ، الامام لازم
يذكر الناس بكيفية الصلاة. معقول الناس مش عارفة ؟ طيب
ولو هما مش عارفين وسعادتك عرفتهم الجمعة دى ، ايه
لازمة تكرار الدرس ده الجمعة اللى جايه برضه ؟ بيتهيألى أننا
شعب مش بيتعلم ! يعنى التعليم عندنا فرض كفاية ..
مادام
فيه واحد عارف ، خلاص .

أديك مثال تانى ، مترو الأنفاق بقاله كام سنة مزروع فى
القاهرة ؟ ومع ذلك تلاقى الناس لسه بتستكشفه !! ومش
عارفة اتجاه ايه رايح فين . وناس كتير مش عارفة محطة
ضواحى الجيزة اشتغلت واللا لسه . ومرة واحدة قابلتها
فى المترو كانت فاكرة انها ممكن فى أى محطة تغير من الخط
الأول للخط التانى !

معقول الجهل اللى احنا فيه ده ؟ يعنى انتوا عارفين ان
تذاكر المترو موحدة ب 75 قرش من فترة طويلة .. اتحدى
انك
تقف قدام شباك أى محطة وما تلاقيش واحد يقطع تذاكر
ويقول
"واحد رمسيس واثنين عتبة " !

الشعب عندنا مش عارف يستخدم المترو ، وبعدين يزعلوا من
نظيف علشان بيقول انهم مش ناضجين سياسيا. دول أصلا مش
ناضجين فى أى حاجة. الكارثة رهيبة ونسبة الأمية مرعبة.
واللى بيعرفوا يقروا مش عارفين يركبوا المترو والناس
اللى بتصلى لازم الامام يقولها تصلى ازاى.
يعنى الأمام ده لو كان امام زرقاوى وقالهم يفجروا
نفسهم
فى أي داهية ، تفتكر حيسألوا أو يفكروا ؟ طبعا لا .
كفاية ان واحد تعب وفكر . اتعب انا كمان ليه ؟


بلاش كل ده ، ادخل أى مصلحة حكومية واسأل عن خطوات
استخراج ورقة معينة ، حتلاقى انك محتاج تعمل بحث علمى
وتعدى على كذا نفر علشان تكون صورة مبدئية للمطلوب .
ومفيش واحد عارف كل الخطوات مع ان ده شغله من عشرات
السنين . أنا اشتغلت فترة فى تركيب نظام كمبيوتر فى
قطاع حكومى. المفروض ان النظام ده حيقوم بنفس الخطوات اللى
بيقوم بيها الموظفين. المشكلة العويصة اللى كانت
بتواجهنى ان مفيش حد فاهم نظام الشغل اللى هو بيعمله
ماشى ازاى !

طيب احنا نبرمجه لك ازاى اذا كنت انت مش
عارفه ؟ واحد همس فى اذنى قائلا : بص ، انت لازم تيجى
بكره علشان الاستاذ فلان اترقى وبقى وكيل وزارة وحيسيب
المكتب من بكره وهو ده الشخص الوحيد اللى فاهم الليلة
كلها . لو الراجل ده انت ما قعدتش معاه مش حتفهم من
الناس اللى هنا حاجة ! وبالفعل اجتمعت معاه وكان باقى
الموظفين قاعدين وهما بيتكلموا معايا وهو قاعد
بالسيجارة يتدخل فقط عند الحاجة ، يصحح لهم الأخطاء ويوضح لهم
التفاصيل .. تخيل واحد بس هو اللى فاهم الشغل والباقى
مش عارفين هما بيعملوا ايه ؟

أعتفد ان ده سبب أساسى من أسباب تخلفنا الشنيع.. ان
محدش
عارف حاجة ومحدش عايز يعرف إلا الضرورى لحياته وبس.
وياريته يعرفه.ربنا يرزقنا ويرزق المصريين كلهم علما
نافعا .. قولوا آمين


6 Comments:

At 11:44 AM, Blogger Haitham said...

اما عن حكاية محدش عارف حاجة دى بصراحة واقع بينطبق عاى كل المصريين دلوقتي .. أظن عدم التركيز والمشاكل و الهيمان اللى فيه الشعب دلوقتي هو سبب التوهان ده

 
At 2:35 PM, Blogger معاذ رياض said...

عزيزى هيثم ، مرحبا بك.. أنا متفق معاك بس مش لازم نرمى السبب على المشاكل والظروف وننام على كده.. عايزين ندور على حل. ولو صغير لحالة التوهان دى. مش كده ؟

 
At 10:28 PM, Blogger shady said...

شوف مين متوهه شوف مين مجوعه شوف اعلام مين عمله غسيل مخ
شوف مدارس مين طلعته جاهل
شوف سياسة مين علمته ما يتدخلش فى اى شئ ولا يسال عن شئ وان رايه دايما ملوش لازمه
مشيه المشكله حتتحل
شفت الحل سهل اذاى

 
At 3:39 AM, Blogger KING TOOOT said...

معاذ
الأنسان الفقير و الباحث فى كل أتجاه عن لقمة العيش , الثقافة بالنسبة له نوع من انواع الترف
و الانسان اللى عايش بيواجهكل يوم بسلسله متتاليه من الأحباطات المتكررة ماتنتظرش منه أنه يتصرف بتحضر و أنه يفهم و يبدع و يجتهد
الناس فى بلدنا أغلبهم مايعرفوش أللى أنت بتقوله ده
هما عايزين ياكلوا و يشربوا الأول و يتعالجوا و يلبسوا و يسكنوا و بعد كده يبتدوا بقى يلاقوا شغل و ساعتها ممكن ينتبهوا بقى لسلوكياتهم الغلط و يصلحوها
KING TOOOT
kingtooot.blogspot.com

 
At 4:31 PM, Blogger Haitham said...

عزيزي معاذ ..أنا مابرميش السبب على المشاكل والظروف ولا باقول اننا ننام ..لكني أظن ان التفكير السليم يخلينا نعرف الأسباب بعد كدة نتغلب عليها عشان نوصل للمستوى اللى احنا عاوزينه في أى مجال ..مش كدة ولا أيه ؟

 
At 2:53 AM, Blogger bosbos said...

يا ناس الشعب المصري مش جاهل ولا تايه معتقدش ان عدم معرفة سعر تذكرة المترو دليل جهل او توهان الناس عندها حاجات كتيره تركز فيها اهم من سعر تذكره

 

Post a Comment

<< Home