كتبت: بنت مصرية
المرة دى بنكمل أيام اسكندرية الجميلة... بصراحة الواحد لو قعد يتكلم عنها مش هيكفيها
الصور هتعبر اكتر
تمثال العروسة والبحر
المرسى ابو العباس بتاع أجدع ناس
الترام الإسكندراني
اسكندرية بجد.. بحر وشبك
أيس كريم وكورنيش
يا خبر يا خبر.. وغزل البنات كمان
قهوة اسكندرانى.. مش عارفة تفرق ايه عن قهاوى بقية مصر.. بس كفاية انها فى اسكندرية
كارتة.. العامل المشترك الأول فى كل المناطق السياحية المصرية
posted by Ghada @ 8:36 AM
7 Comments:
فعلاً بنت مصرية ماشاء الله محترفة في موضوع الصور ده ، والصور المرادي شوقتني بجد إني أروح اسكندرية تاني مع إني لسة راجع منها امبارح ، يا ترى فاضل إيه لسة متصورش .. همم .. لسة فاضل قهوة أنّح في بحري و طبعاً جيلاتي مكرم و كبدة العربي وخروب آمال بتاع شارع صفية ، ولا مانع من آثار كوم الشقافة وبيت قسطنطين كفافيس ..
ما تنسيش تسجلي الحاجات ده عندك لغاية ما تروحي اسكندرية في أقرب فرصة إن شاء الله .. ;)
صور تجنن يا بنت مصريه .. بجد عرفتني تنقلي جو البيئه السكندريه .. علي فكره الترام الاصفر ده ما بقاش موجود الا ف اسكندريه ..
قهوه انح و جيلاتي مكرم و "سيد صواريخ" و خروب امال .. اممممممممممم .. حامد انت عشت ف بحري ولا دي مجرد اسماء لقطتها و انت بتتمشي ؟
أنا معشتش في بحري يا روز ، بس بحب اسكندرية لدرجة متتخيليهاش ، وبحب بحري بصفة خاصة ، ليه طعم لوحده بجد ، تحسي إن أهله همة الإسكندرانية اللي بجد ، اللي بيقولوا يا خويا ويا صاحبي .. كل ما أنزل اسكندرية يا روز لازم أتمشى بلاهدف في بحري .. يا إما أخدها من الرمل لغاية مكرم على الكورنيش ، أو أخرم من محمد كريم .. يعني .. الخلاصة إن ترابها زعفران ..
bavalova
يا بنتى اعملى البلوج ولا يهمك هتبقى فكرة حلوة أوى وانا لو لقيت صور تنفع تتنشر عندك هبعتهالك
حامد
ولا محترفة ولا حاجة
الصور المرة دى دوختنى وانا بدور عليها
بهدلتنى سيرشا وتنقيبا
انا ناوية ان شاء الله لما انزل قرررررريب اصور بنفسى
بس انا معرفش الناس اللى بتقول عليهم يا حاكد
انا اعرف محطة الرمل
الكورنيش
القلعة
بير مسعود
خالد بن الوليد
المنتزه
دول اللى ولاد خالتى بيودينى ليهم
ممممممممم
انا لازم استكشف بنفسى
ساحر الصحراء
غادة ذوق ذوق ذوق الصراحة فى اختيار الميوزيك بتاعتها
رومانتيك روز
انتو بتحنسونى ليه
عاملين زى محمود زميلى فى الشغل
جه امبارح من اسكندرية وعمال يحنسنا ويعقدنا
ودعاء زميلتى بردو كانت الإسبوع اللى فات هناك وجت اقول ما شافتنا قالت لنا
يا ملوثين
هههههههههه
بس جيالك يا اسكندرية جيالك يا ام البحر
نقدم المشيئة
الحاجات اللي أنا بقول عليها ده يا بنت يا مصرية هية ملامح اسكندرية بالنسبالي ، لو عاوزة نصيحتي ، لما تنزلي المرة الجاية اسكندرية إن شاء الله ، سيبك من ولاد خالتك ، وإنزلي المنشية ، واتمشي في شارع محمد كريم لوحدك كده لغاية متوصلى للمرسي أبو العباس وبعدين كبدة سامي وبعدين جيلاتي مكرم العظيم ..
أما عن بيت كفافيس ، فلو كنتي مهتمية إنك تشوفيه ، إبقى قوليلي بس قبل متسافري و أنا أوصفلك الطريق ، والدخول مجاناً للمصريين بالمناسبة .. متقلقيش يعني :P
بجد الصور دي جميلة جدا
اسكندرية أكتر منطقة بحبها في العالم محدش يستغرب اسكندرية ملهاش حل سواء في الموقع علي مستوي العالم او علي جوها ف الصيف والشتا والربيع والخريف او ريحة البحر وانت ع الكورنيش وطبعا السمك اساسي
اما عن الاسكندرانية فهما جدعان وكرما وطيبين ودمهم خفيف ومحبين للحياة وبيحبوا السهر والحب والاخرين سواء داخل مصر او خارجها
احلي حاجة لما تمشي في اسكندرية باليل في الشتا وياحبذا لو الدنيا بتشتي سواء راكب العربية أو ماشي علي رجلك
اسكندرية يعني الكورنيش ابو العباس ابوقير رشدي ستانلي كفرعبده الابراهيمية الطابية الفراعنة مصطفي كامل بوكله جليم زيزينيا لوران اللبان سموحة ثروت فيكتوريا سيدي بشر ميامي المعمورة العصافرة وأحيانا القباري الورديان العجمي اما عن الشوارع اللي مفيش زيها علي مستوي العالم برضه تلاقيها شارع 45 سعد زغلول صفية زغلول الاقبال شعرواي الشهدا الفلكي سوريا النبي
دانيال
ياجماعة اسكندرية ليها خصوصية عالية
وروح حلوة وكفاية انها اتأثرت بكل ثقافات العالم الرومان عاشوا فيها كتيير والانجليز والفرنساويين
عشان كده تلاقي الاسكندرانية اكتر ناس يحبوا التعارف ويتقبلوا الاخر ويرحبوا بيه
يا جماعة ميرسى جدا لكل الى بيشكروا فى مكرم بتاع الجيلاتى انا بنته
Post a Comment
<< Home