محجبة? يبقى بلاش تتجوزي..
فضفضة: أميرة
من سنة وشوية ربنا رزقني بالعمل في المجلة الإلكترونية دي ومن حظي "اللطيف" اتطلب مني إني أكون مسئولة عن باب إسمه "قمر 14" وطبعاً واضح من الإسم إنه موجه للبنات اللي "قمر "14 أو للبنات إللي مش "قمر 14" ونفسهم يبقوا "قمر "14.. المهم... بما إن سياسة المجلة بتقوم على تدليل القاريء وتدليعة والاستجابة لأي طلب من الطلبات.. والإجابة عن أي سؤال مهما كانت سذاجته وغباؤه.. فكان لازم أهتم من -أجل لقمى العيش طبعاً- بطلبات الآنسات والسيدات الجميلات..
المشكلة بقى إنه اتبعت لي أكتر من خمسين إيميل البنات بيطلبوا فيها فساتين فرح للمحجبات.. وأنا عملت فيها الخبيرة بشئون البنات وقلت دي سهلة.. وبدأت أدور بمنتهى الثقة على النت عن أي مصدر بيتكلم عن المحجبات وبدأت رحلة البحث على google العزيز باللغة العربية "حجاب" مفيش "محجبة" لا حياة لمن تنادي... بدأت أقلق.. حاولت مرة واتنين ومليون وبعد ما فقدت الأمل قلت من باب الغلاسة أشوف حظي مع بلاد الفرنجة واستخدمت لغة الخواجات وكانت النتيجة مش مبهرة للدرجة بس على الأقل في نتيجة... وشوية وظهرت النتيجة المبهرة بعد البحث باللغة التركية اللي مليش أي علاقة بيها بس جت معايا كده بالشبه وعملت عدد نال اعجاب الجماهير..
المشكلة يا جماعة لما واحدة تبعت لي وتقول أنا محجبة شكلي كده حاقلع الحجاب في الفرح علشان مش لاقيه موديل شكله حلو.. طبعاً الكل في البداية حيشتم فيها بس لو فكرنا شوية - مع اختلافي الشديد معاها- حنلاقي إنها معذورة.. آه معذورة لما يكون كل المحلات بتعرض الفساتين مفتوحة شكلها تحفة وبعدين تعرض عليكي إنها تقفل الفستان ويطلع في الآخر الفستان شكلة "مرقع" أو شكله "جلابية" أو متقفل "بقماش شفاف" قلته أحسن..مش برضه تبقى معذورة إن دماغها تميل لقلع الحجاب.. ولما ميكنش في ولا موقع ناطق باللغة العربية بيعرض أي تصميم للعروسة المحجبة وكل علاقتهم بالمحجبات هي شوية عبايات كئيبة تنفع جدتي ولما تكون المحلات المخصصة للمحجبات اللي مالية المولات بتبيع الإيشارب الشفاف اللي لسه عايز إيشارب تاني تحته بـ150 جنية وأكتر.. مش برضه ممكن تقول أهي ليلة وتعدي...؟!!
أنا مش بادعو البنات إنها تقلع الحجاب يوم فرحها وأنا شخصياً محجبة ومعتزة جداً بحجابي بس بجد مش حاجة تحرق الدم لما نكون بلد "مفترض" إنه إسلامي وفي وطن "مفترض برضه " إنه إسلامي ومع ذلك العروسة متلاقيش حاجة تلبسها يوم فرحها؟!!
posted by Ghada @ 6:33 AM
16 Comments:
موضوعك مهم وجميل جدا يا أميرة
بس مش عارفة ، لو كان اتكتب قبل كده بسنة او اتنين كنت أقول، لكن دلوقتى فى فعلا فساتين محجبات تحفة وطرق لفات الطرح تحفة نحفة تحفة
مش طبعا تبقى محجبة بشيفون ولا الهبل ده،
لكن فساتين الأفراح للمحجبات دلوقتى بقت جميلة جدا وبتتقدم وتتطور كمان
طيب تعرفى أنا أعرف بنت لبست حجاب فى فرحها عشان كانت أجمل فيه
يمكن صعب فعلا تلاقى فساتين من النوعية دى ع النت دلوقتى لان الموضوع يعتبر لسه جديد، بس لو ختى كاميرتك ورحتى اى اتيليه دلوقتى هتقدرى تاخدى صور لفساتين فى منتهى الجمال والإحترام
ربنا يستر المشكلة دى ممكن تتسبب ان بنات كتير جداً يقلعوا الحجاب
اكيد دى مؤامرة امريكية صهيونية
للقضاء على الحجاب انا مش عارف منظمة المؤتمر الاسلامى ايه موقفها من الموضوع ده بس هم اكيد حيطرحوه لنقاش فى اجتماعهم القادم
موضوع حلو وايد وايد وايد
بس احنا بالكويت مرتاحين من هالموضوع لان اعراسنا غير مختلطة مثلكم في مصر بس اعراسكم حلوة واييييد فيها رقص واغاني ووناسةوخصوصا ان العروسة تنزل ترقص طول الليل مع اصحابها في الكويت العروسة ترقص على اغنية وحدة بس وبعدين المعازيم بيكملوا رقص للصبح.
This comment has been removed by a blog administrator.
والله يا أميرة كلامك صحيح 100% وده اللي يخلي بنات يقلعوا الحجاب في فرحهم وفيه منهم اللي بيكون ده غصب عنها.. والكلام ده مش من عندي.. مش عارفة ليه مش بيرضوا جميع الأذواق؟! والمشكلة كمان إنك زي ما قلتي فين وفين على بال ما تلاقي العروسة حاجة تمشي.. مش ترضيها.. فما بالك بالناس اللي ذوقها مش هين؟! إنتِ فاهماني طبعاً
أعذروني يا جماعة إني بقتحم المناقشة البناتي ده كالعادة ، بس أنا لية تساؤل بسيط وبرئ ، مع احترامي لكل البنات يعني ، ومن غير متفهموني غلط ، بس هوة لازم فستان أبيض يوم الفرح ؟ أنا بصراحة بحس إنه مُتَكلّف قوي ، حاجة كده مش بسيطة ، شئ معقد يعني ، ضخم ومنفوش وبديل (مش الغوريلا أكيد) ، بس فعلاً كل كلام البنات اللي شاركم كان بيقول إن لومكنش فيه فستان فرح يبقى مينفعش ..
أنا برده أرجع و أقول إني بتكلم بوجهة نظر مغايرة ، يمكن يكون للفستان ده عند البنات مكانة خاصة ، بس بالنسبالي عادي يعني ، معتقدش إن الدنيا هتخرب لو مكنش فيه فستان أبيض يوم الفرح ، مش عارف .. بس ده رأيي ..
بالمناسبة .. شكراً يا أميرة على العدد بتاع فساتين المحجبات ، ده شكر متأخر 5 شهور ، زي ما انتي رديتي على الإيميل بتاعي بعدها بخمس شهور كده !!
;)
حامد
إنت دلوقتى بتتكلم عن اللون الأبيض وللا المنفوش وللا الإتنين
أنا معاك فى حكاية منفوش دى، ملوش لازمة وبيضليق ويلخم واللى بيحتاسوا بيه صحبات العروسة
لكن الفستان أبيض.. لازم يكون أبيض، أجمل حاجة فيه إنه أبيض.. يا خبر لو ماكنش أبيض يبقى فرح إزاى وينور إزاى وتبقى عروسة ازاى
لازم يكون ابيض
دا انا بتغاظ من التطريز لو دخله ألوان غير الأبيض أو أقصى حاجة فصوص فضية ، إنما مش ممكن اعترف بستان فرح مش أبيض
المشكلة مش في إنه أبيض أو تركواز يا بنت يامصرية ، أنا بسأل هوة لازم يبقى فيه فستان أبيض ، أنا أصلاً عاوز أعرف إمتى وصلنا موضوع الفستان الأبيض ده .. و إمتى بقى مينفعش فرح من غيره ، أنا شخصياً بشوف إن موضوع الفستان ده مالوش لازمة خالص ، و إن فستان الخطوبة البسيط بيكون أجمل منه بكتير (ده بفرض إن فيه فستان للخطوبة يعني) ..
ينور إزاي .. هوة بينور كمان .. إنتم أدرى بالموضوع ده بقى !
والله يا أميرة أنا نفسي لما أبقى عريس إن شاء الله لا ألبس لا بادلة و لا كرافات و أروح كاجوال في اللذيذ كده ،هوة أنا رايح أتجوز ولا أخنق نفسي ، وبعدين بيني و بينك كده و كلام في سرّك يعني من غير متقولي لأي بنت من البنات اللي هنا ، فستان الفرح ده بيخلي البنت لونها باهت زي الشبح اللي عنده أنيميا بالظبط ، وبعدين موضوع الجمال اللي بينزل على العروسة في ليلة الفرح ده ، عشان بس الأنظار كلها بتكون عليها ، عشان بتكون هية النجمة بتاعت الليلة مش أكتر ، يعني لو جبتي عمك الحاج سواع أو نسرا وحطتيه جنب العريس هيبقى شكله قمر برده ..
حكون تقيلة دم طبعا لأني صرت تيتة.. الصبية الكويتية قالت لكم أننا مرتاحين لأن أعراسنا غير مختلطة..
يعني البنت يراها كل الرجال وهي في أحلى صورة( المفروض) تستطيع الوصول إليها! الحقيقة أنا أتعجب( وما تزعلوش مني) كيف يرضى العريس والأهل والبنت نفسها أن تكون محط الأنظار وهي محجبة.. الحجاب في الإسلام ليس تغطية الشعر والجلد فقط.. هو طريقة حياة ويرتب علينا التزامات لا تعرفها غير المحجبة..
أقول هذا لأني لمست أن كل المشاركات حريصات على حجابهن.. لذلك أذكرهن أن علماءنا وضعوا للحجاب شروطاً ثلاثة معروفة: أن لايصف، ولا يشفّ ولا يكون زينة في حدّ ذاته.. فتأملي
أعتقد أن إخوتنا المتدينين في مصر يجب أن يعيدوا النظر في مسألة حفل الزواج المختلط.. لأنه يضيق على البنت والنساء عموما، ولا أظن أبدا أنه يرضي الله تعالى..
استحملوني
وعقبال كل الصبايا والشباب.. يا رب
سورية تحب مصر والمصريين
إنتي ضد الفرح يا أميرة .. وجهة نظر عظيمة الحقيقة ، طب بدال الموضوع كتب و كتاب و العروسة تلبسه شوية طب متلبسه في البيت وخلاص ..
وبعدين أنا كده كده إن شاء الله مش هتنازل عنها أبداً حتى لو لبست فستان فحلقي ..
بس مقولتيش ليه غيرتي رأيك بعد مكنتي راسية كده وشايفة إنه بهرجة وتفاهة ..؟
صدقيني يا أميرة فيه أشباح كتييير عندها أنيميا .. إنتي مرحتيش أفراح من زمان ولا إيه ؟
dear mosh keda, the idea of hejab is mysticism in the first place, she has chosen to put the veil because supposedly she has no inclination, or on the way of losing all inclination to look attractive, except for her creator before marriage, and to her husband after that. The mix between those, is like wanting to put 7elw 3ala 7ade2, homma fe3lan mayerkaboosh.
however I aknowledge other social reasons why she might had to put the veil besides the real authentic reasons, if she has put it to please someone, or the whole society even, she has to continue I guess to see what will please themin her weding dress. wallaho a3lamm!!!
وماله لو فى فرح ؟ فى الاسلام لابد من الاشهار والاعلان ..حتى لو الناس مختطلين انا شايفة ان مافيش مشاكل طالما كل واحد بيفرح كويس
يعنى الصورة اللى بشوفها فى الافراح المصرية المختلطة ان العريس و العروسة والمعازيم كلهم هات يا رقص
ويمكن ده سبب ان فى مصر بطلوا يجيبوا راقصات واعتمدوا على الجهود الذاتية ! وفضلوا يجيبوا dj يساعدهم
موضوع الشبح ده لأ ...ده يزعل اوى ...على فكرة يا حامد البنات دايما حلويين واللون الابيض يليق على كل البنات مهما كن لون بشرتهم ..والنفشة اللى بتقولوا فيها دى عشان تدارى العيوب الجسدية للعروسة وغير كده هى بقت عرف يعن حتى البنات اللى عندم رشاقة بيلبسوا منفوش شوية عشان الفساتين الموجودة كده واحدة صاحبتى متجوزة قالت لى ان الحاجة اللى بتنفش الفستان دى مزعجة اوى بتبقى سلك على فكرة!
بالراحة يا اميرة
انا لا عايزة اكحلها ولا حاجة ...انا بس بقول رأيى
وموضع الرقص انا انا ما بشجعهوش
حلو اوىو اوى اوى ان الناس ترقص كل ناس لوحدهم الولاد فى حتة والبنات فى حتة بس ما يكونش ده فى الفرح يعنى يكون فى بيوتهم!
انما الفرح يكون تجمع عائلى مش مشكلة يكونوا مختلطين لكن باحترامهم
موضوع الفستان ده على فكرة من رأى مصممى الازياء !
أنا معاك يا حامد فى موضوع الفستان ده انه مالوش لازمة على الأقل عند الزوج. المشكلة انك لو قلت لمراتك كده حتفتكر انك بخيل ومش عايز تدفع. وكمان أنا معاكى يا أميرة فى أن الفرح يكون حاجة بسيطة وما يكونش فيها محرمات بس برضة لو قلت كده لحد مخه صغير حيفتكر انى عايز أوفر وانى مش شارى العروسة !
أما الموضوع الرئيسي هنا وهو موضوع الحجاب فأنا لا أحترم البنت المحجبة التى تخلع حجابها ليلة زفافها تحت أى حجة.. باحس انها بتستهر بالحجاب وبعقولنا .
السلام عليكم اولا انا احمد من مصر ممكن اقول رائيى فى الموضوع لو تسمحو لى انا شايف ان الفستان والامور دى كلها شكليات ومحدش بيستفيد بيها بعد الفرح ولية ميكنش الفرح بسيط والزفة بسيطة ولزيزية المهم يكون هناك الالفة بين الزوجين وعلى فكرة مهما كلفتى الفرح مش هيعجب الناس وهيدنهم يتكلمو عنة العروسة لبسة فستان مش عارف شكلو اية وكانت قمر لاء مكانتش هية ولا كانت فى الفرمة البساطة جميلة وياريت مل شابين دخلين على الجواز يفكرو بطريقة جديدة فى فرحهم دة هيخلى بينهم مشركة من او الطريق
Post a Comment
<< Home