رمضان فى مصر طعم تانى
كتبت: بنت مصرية
ليلة الرؤيا، والناس مستنين المفتى يقول النهاردة المتمم،أو.. لأ بكرةومين من الدول هتصوم معانا ومين هتتأخر أو تبدأ بدرى، واستغراب دائم ليه دا بيحصل؟ أزمة حادة فى التليفونات.. الناس بتهنى بعضها كل عام وانتم بخير. وناس بتشحن الموايل عشان تبعت مسجات فانوس فى كل بلكونة.. وفى كل إيد صغيرة.. وكبيرة أحيانا كنوع من الإرتداد للطفولة أو هدية خطيب لخطيبته.. فانوس صفيح وللا بلاستيك، بالشمع وللا بالبطارية.. بيغنى رمضان جانا وللا كامننا..
المهم إنه فانوس زينة تملى الشوارع.. بلاستيك ملون، أو صفيح الهوا يخبطه فى بعضه يعمل شخللة..
والأحلى زينة ورق يعملوها الولاد والبنات يلزقوها بنشا ويلضموها بدبارة وعلى السلالم يتشعلقوا بين بلكونة وبلكونة.. ويدوروا يشوفوا أكتر شارع علق زينة قطايف وكنافة ومدفع وموائد رحمن... و مساجد مليانة ناس.. فى الفجر وكل الفروض والتروايح والتهجد ناس فى المواصلات ماسكين مصاحف.. عايزين يعملوا كذا خاتمة ومايضيعوش وقتناس تبطل تكدب، وناس تبطل تنافق، وناس تبطل نميمة وغيبة وغش ناس تواظب ع الصلاة.. وناس كل ما تقابل فقير تديله اللى فى جيبها بنات بتغطى شعرها فى رمضان عايزة تاخد ثواب كامل..
وأولاد يبطلوا يعاكسوا البنات فى الشارع بردو عشان الثواب الكامل أمهات واقفين فى المطبخ يحضروا الفطار ويدوروا على الآية بتاعة جزء النهاردة فى مسابقة الإذاعة طفل يعيط.. عايز يصوم لحد المغرب، ومامته تقوله لأ لازم تصوم الأول صومة الفار لحد الضهر. وطفل تانى دخل يدور على لقمة من ورا أهله.. ويكمل صيام أتوبيسات وبواخر وطيارات بتنقل أفواج المعتمرين ولازم كل يوم تشوف ناس بتودع ناس لابسه أبيض فى أبيض كلهم شوق يقضوا رمضان جمب الحبيب فى المدينة عمايل الكحك والبسكوت والغريبة والبتى فور.. وتنفيضة رمضان وتنفيضة العيد..
قطمة وسط لكن مرشوشة سكراللمة والعيلة والعزومات والود القديم.. اللقمة الهنية اللى تكفى مية العشرة الأواخر.. والبحث عن ليلة القدر.. الدنيا النهاردة مطرت، الشمس مش حامية.. النهاردة ليلة القدر، لأ دى كانت أول إمبارح.. لأ دى لسه هاتيجى.. أنا حاسس، أنا حلمت.. الخيال والأمانى والتمنى واللى يصبر ينول رمضان فى مصر.. رشة سكر تنعش أرواحنا
posted by Ghada @ 10:04 AM
13 Comments:
رمضان فى مصر حياة اخرى
و الاحلى قبل الفطار بربع ساعة تلاقي الشوارع مليانة بالناس واقفين مستننين الادان ،والاطفال ماسكين العابهم النارية منتظرين المدفع
ويا دوب الادان يأذن متلاقيش مخلوق في الشارع ،وتبتدي تسمع سيمفونية من اصوات المعالق و الاطباق
كل هذا لا تجده الا في حي شعبي كحي شبرا
الظاهر إن رمضان أصبح مثير للشجون اكثر منه مثير للذكريات
يلا ربنا يسامحك انك فكرتينى بكل اللى اتحرمت من أنى اشوفه علشان انا بشتغل فى السعوديه
يلا كل سنه و انتم طيبين
يا ربنا، انت زعلتنى كده يا انونيمس
انا مااقصدش والله
عموما ربنا يرجعك بالسلامة ويقدرك على غربتك.. بس انت استمتع برمضان فى السعودية كمان، أكيد رمضان ليه طعم خاص فى كل بلد
كل سنة وانت طيب ورمضان كريم وأمانة لو زرت النبى سلملى عليه
و انتى طيبه يا بنت مصريه
و الأمانه تتنفذ انشاء الله
وانت طيب يا انونيمس :)
وآمييييين
انتِ جميلة قوي يا بنت مصرية
:)
نور
ربنا يكرمك يا نور
فينك يا بنتى
رمضان كريم
مقال حلو .. وتمنياتى بالتوفيق وكمان
والا بلاش ...
يعنى إن أمكن أرجو تشريف مدونتى بحتة مقال ضغنون من أشهر مدونة مصرية
فعلا رمضان من غير مصر ميبقاش رمضان ........ بحبك يا مصر
بجد انت جميلة جدا يا بنت مصرية لان المصريين بس هما اللى عارفين شهر رمضان طعمة اية فى مصر
Post a Comment
<< Home