مصر مش كده
شعر: اسكندراني
من جوة جرن القمح هاتي الصور يا وداد
بقى ليها عازة وفرجي الأولاد
الصورة دي بهية والنهار نهارين
واحد في منديلها والتاني جوة العين
والعين بصيرة وكلنا عارفين
بس الأيادي لسة برضه شداد
من جوة جرن القمح هاتي الصور يا وداد
بقى ليها عازة وفرجي الأولاد
بعد الكلام اللي تقال ف التلفزيون
عن البكيني وغطّيني وعن ناس بقروون
لو مستمع طبعا عاقل ح يقول ده جنون
ولا يرضى مصر تكون بيعة ف ايد الاوغاد
من جوة جرن القمح هاتي الصور يا وداد
بقى ليها عازة وفرجي الأولاد
بقى دي يا ناس مصر الحرة بنت الثورة
ليه بس عايزين يبيعوكي للناس برة
ده أنت الأميرة وعارفينك كل الامرا
و كفاية بس نجيب سيرتك النور ينقاد
من جوة جرن القمح هاتي الصور يا وداد
بقى ليها عازة وفرجي الاولاد
مصر الجميلة ف عيوننا احلى ما فيها
قلوب تسبح بخالقها واللي حاميها
يا رب احرص لنا بارك الخير ليها
واجعل نهارها ولياليها كلها أعياد
من جوة جرن القمح هاتي الصور يا وداد
بقى ليها عازة وفرجي الاولاد
وليد يوليو 2005
posted by Ghada @ 12:41 AM
6 Comments:
قصيدة رائعه و أحاسيس مصراوية حقيقية جدا ً جدا ً و كمان صورة شعرية فى منتها الذكاء و الوضوح
من جوه جرن القمح هاتى الصور يا وداد
بقى ليها عازة و فرجى الأولاد
حقيقى أحنا محتاجين ( كلنا ) اننا نتفرج على الصور تانى و تالت و رابع و عاشر علشان ما ننساش مصر بتاعتنا دى أبدا
أحييك يا أسكندرانى من كل قلبى
و طبعا ً تحية خاصة منى لغادة لأنها بتختار أشعار للأفتتاحية بتاعت المجله كلها بتكون أشعار من قلب مصر فعلا ً و بتعبر عن مصر بحقيقى
KING TOOOT
kingtooot.blogspot.com
This comment has been removed by a blog administrator.
أولا شكر خاص جداً وامتنان لغادة على الثقة في الكلام بتاعي واتاحة الفرصة عشان نقرا افكار بعض حتى من غير ما نشوف بعض. أنا نفسي حلم جريدة أو مجلة عن مصر يبقى حقيقة ويضم كل اللي بيشاركوا معاكي هنا ويقراها كل الناس.
ثانياً كينج توووت .....صدقني كلامك ده خللاني احس اني عاييز اكتب عشر قصائد دلوقتي وأحب اقوللك من غير مجاملة أنا قريت القصيدة بتاعتك عشر مرات لدرجة اني حسسييت اني انا اللي كاتبها من كتر ما حسيتها. ارجوك أكتب تاني عشان طول ما بنكتب طول ما ح نطلع صور....... أسكندراني
جميلة الروح اللي بتتكون هنا دي بجد ..وجميلة الروح اللي جمعتكم ..
اللهم حقد يعني!
عاوزين الحماسة تزيد .. وتفضلو تكتبو معانا على طول .. وماتنسوناش بعد الشهرة
;)
أهنيك من قلبى ..من غير لعب أى دور غير إنى متذوق على قدى للشعر إنت جميل والأجمل إنك من إسكندرية يعنى بصرة
زرياب ..... مشكور على الكلام الحلو ده وعلى فكرة انا مريت على البلوج بتاعك ...انت هايل وبالذات الي كتبته عن موضوع جواز السفر.
Post a Comment
<< Home