Sunday, August 14, 2005



خروجة تحفة!



كتبت:
بافالوفا

بصوا يا إخوانا أنا بعد فترة ليست بقصيرة قابلت صديقتي و بعدين , و كعادتنا قررنا نزور إحدى المزارات السياحية في قاهرة المعز-يعني قولنا إحنا أولى من الغريب- و طرنا على برج الجزيرة و كلنا أمل إننا حنشوف منظر رائع من فووووق. مضحكش عليكم , أنا مرحتش هناك غير مرة وحيدة أيام الطفولة وكانت فرصة عظيمة إني أستعيد الذي مضى
المهم, رحنا وكنا مبسوطين أوي بنفسنا و وقفنا كدة بكل فخر أدام شباك التذاكر و سألنا:التذكرة بكم لو سمحتي؟ ردت عاملة الشباك:15 جنيه. قلنا:طب للمصريين؟. ردت: 15 جنيه. قلنا:طب للطلبة؟. قالت: 15 جنيه
رسمنا ابتسامة صفرة بلهاء على وشنا و شكرناها و تمنينلها يوم سعيد واختفينا
بصراحة استخسرت 15 جنيه في بصة يتيمة لا راحت ولا جت. و أنا اللي كنت فاكرة إن الدولة بتدعم و تشجع السياحة الداخلية


و بعد الخروجة التحفة دي و المشوَرة رايح جاي في عز الشمس, قعدت أفكر, يعني لو رجل ذو دخل متوسط نفسه يفسح أسرته ميقدرش يخدهم مكان زي ده, مش معقول يدفع لكل فرد في أسرته 15 جنيه, يعني لو أسرة مكونة من 5 أفراد يدفع سيادته 75 جنيه و كل ده عشان يبوصوا بس أمال لو أكلوا حيدفع كم
هي دي يا جدعان مش بلدنا وإحنا أولى بيها و لا إيه؟ المفروض تكون المزارات دي حق مكفول لكل مواطن

2 Comments:

At 6:57 AM, Blogger shady said...

كان زمان فيه سعر للمصرى وسعر لطلبه وسعر للاجنبى
بس زمان لما كانت الحكومه من الشعب ولاجل الشعب
انا بحس دلوقتى ان الدوله من اجل خدمة السياح فقط البريطانى والفرنسى واليابانى صدقونى يا ساده لهم حقوق فى مصر اكثر من المصرى ذاته
اخر مصيبه قرتها الاتنين الكوايته الشواذ اللى اتجوزوا بعض فى هيلتون رمسيس بلدهم رفضت ومصر تحت مسمى السياحه وافقت
اشوف فيك يوم يا حسنى

 
At 9:28 PM, Blogger KING TOOOT said...

و أيه يعنى لما تبقى التذكرة بخمستاشر جنيه ؟ ولا تبقى حتى بخمسين جنيه ,, ماهو كل دخل للدوله و كله متروك للعرض و الطلب و سعر السوق و الحاجات الحلوة دى ,, و مش معقوله حانمشى خارج ركب العولمه أللى ماشى اليومين دول و طبعا ً كلكم عارفين أن الدعم و المساواه و التكافل و الحاجات الكـُخه , الياي الوحشة قوى دى خلاص الحمد لله بطلناها و بقينا دلوقتى بتوع عصر العولمة و التكنولوجيا و العقل الألكترونى و العقل الكرتونى و العقل الحلزونى و الكلام ده كله
أما بالنسبة للراجل أللى عنده أسرة من خمس أفراد و دخله على قده , ف الراجل ده بقى فى عصر العولمة مالوش حق أنه يتفسح أو يفكر حتى أنه يتفسح ,, هو مالوش حق فى عصر العولمة أنه يعيش أصلا ً مادام مش عارف يسرق ولا ينهب ولا يرتشى و كل الوسائل دى متاحه و موجوده بس هو بقى أللى مالوش مزاج يمشى فى قافلة العولمة الميمونه
و يجعله عامر
KING TOOOT
kingtooot.blogspot.com

 

Post a Comment

<< Home