كتبت: بنت مصرية
لو هتقفوا قصاد أى معبد مصرى هتلاقوا إن أول حاجة تشد عنيكو هى مداخل المعابد
ضخمة ومهولة وتحس إنك هتدخل عصر فرعونى كامل يعنى داخل الزمن نفسه مش المكان بس
مدخل معبد إدفو نموذج واضح
أنا ليا أوديكو بس ماتسألونيش إيه اللى مرسوم -مكتوب- على الجدارن ده. أكيد حاجة حلوة
معبد إدفو من أجمل معابدالعصر البطلمى.
وبرغم إنتهاء عصر الفراعنة وقتها إلا إن الطراز فرعونى والرسوم فرعونية وكلها متأثرة بمعتقدات الفراعنة حتى إن المعبد بنى من أجل المعبود الفرعونى حورس.
حورس ده بأه حكاية.. تقدر تقول كده وريث العرش يعنى الترجمة الحديثة ليه تبقى جمال مبارك
posted by Ghada @ 3:36 AM
14 Comments:
جميلة الصور يا بنت مصرية..
والله كان ممكن أعمل بوست لصورنا هناك في رحلة الأقصر و اسوان لولا أن أنا و العيلة الكريمة ظاهرين فيهم كلهم :)))
بس فين صورة قدس الأقداس؟؟ أهو ده من أحلى الحاجات هناك
و لو إني مش متأكدة هو كان في إدفو ولا معبد تاني..
"لو هتقفوا قصاد أى معبد مصرى هتلاقوا إن أول حاجة تشد عنيكو هى مداخل المعابد"
مادام احنا واقفين قدامه يبقى أكيد مش حانشوف الا المدخل.. مش فاهم معنى الجملة دى ؟ يعنى مثلا حنكون واقفين قصاد معبد ويشد عنينا حاجة تانية غير المدخل ؟
نور
ودى نفس مشكلتى انا كمان.. عندى صور حلوة من هناك بس بظهر فيها انا واصحابى.. وشوية سياح على ما قسم
-------
معاذ
اه صحيح ايه الجلمة الغريبة دى
بس انا اقصد ان احلى حاجة فى المعابد هى مداخلها
هو طبعا وانت واقف من بره مش هتشوف غير المدخل.. بس اقصد ان المدخل بيبقى رائع اروع من اللى جوه
دا فى رأيى مش أكتر.. دا اللى بهرنى اكتر
هههههههههه
اما انا عليه جُمَل.. معلش يا معاذ
يا رب يكون المعنى وصل المره دى
معبد إدفو ..
المكان ده بحبه قوي يا بنت يا مصرية ..
أن قعدت في إدفو 5 أيام كان ليهم جو و طعم غريب جداً..
معبد إدفو بالمناسبة من المعابد النادرة الكاملة ، أقصد إنه تقريباً مفيش حاجة مهدودة منه ، مكان جميل فعلا .. متشكرين يا بنت يا مصرية ..
مش حورس ده هو الشعار بتاع مصر للطيران..؟؟
الله يهدهم
أمنيتي إني مرة ألبس ولد وأسيب بطاقة دعاء وبيانتها وأروح مع حالي أسيح في بلاد الله أشوف آثار الأولين، من غير ما حد يزعجني أو حد من أخواتي اللي باحبهم جداً يستغرب من رد فعلي وتعليقي على شيء تشكيلي، هوائي...، أي حاجة خاصة جداً. أو يستعجل فيبتر لحظات تأملاتي أمام حاجة من الحاجات دي.
دي مجرد زيارة للمتحف المصري الواحد بيحس على أثرها بالهول، بعدم التصديق، مش عارفة، بيحس بخليط غريب كده.. فما بالك يا بنت يا مصرية لو رحت وتقمصت الدور بقى وعشت في قلب الأحداث؟! لا جواب... ع العموم لحد ما يتحقق ذلك
وبالطبع -أقصد إني أسيح في مصر مش ألبس ولد- أحب أقول لك إن صورك جميلة وبتعدي في الواحد وتعديه لأماكنها
وآدي مكان كمان يتحط على قايمة
places to visit..
عقبال ماالحصار اللي أنا فيه يتفك.. قولو آمين!
:)
دعاء و غادة
مش عارفة أقولكوا ايه
خلينى صريحة اوى هنا
انا لما رحت الأقصر وأسوان ماحستش بالإنبهار الجامد اوى ده اللى شفته فى عيون السياح. كانوا يقفوا يتنحوا على التماثيل واللى مرسوم ع الحيطان
وانا واصحابى كنا ندخل مثلا متحف من هنا نخلصه فى خمس دقايق.. وللا معبد نقعد نتصور وندور على خلفيات لطيفة مش اكتر
خايفة يكونوا شايفين حاجة احنا مش شايفنها ;)
فن وكده يأه
ما بهرنيش وهبلنى غير مداخل المعابد
وبهو الأعمدة بتاع الكرنك أو أى بهو فى اى معبد تانى
اللى استمتعنا بيه هناك اوى اوى اوى الجو
والنيل
وانا بشكل شخصى حبيت السد العالى
يمكن سر إنبهار السياح هو بقاء الآثار كل السنيييييييين الطويلة دى
الإستمرار فى حد ذاته معجزة
مش عاوز أحبطك أكت و أكتر يا بنت يا مصرية و أقولك إن الكرنك معجبنيش خالص ، حسيت إنهم مكبرين موضوعه أكتر من اللازم مع إنه مكسر وحالته مش قد كده ، معبد الأقصر هوة اللي جمييل بجد ، و أنا زيك استمتعت اكتر بالجو العام و النيل و معبد فيلة ، وحطي تحت الصوت و الضوء في معبد فيلة عشرتلاف خط ، مقولتيش روحتي فيلة و لا لأ ، بس بجد بجد اللي نفسي أشوفه هوة أبو سمبل ,, ربنا يسهل و تجيلنا فرصة إننا نروح هناك ..
عجبنى أوى وصفك ان اول حاجة تأثر فيك هو ضخامة المدخل
فعلاً دا الأحساس اللى انا حسيته لما شفت المعابد انى انتقلت لزمنهم
كمان حسيت اد اية احنا صغيرين جداً بالمقارنة بيهم و طبعاً مش قصدى الحجم بس قصدى كل حاجة
هما أكيد بيقولولنا : انتوا كبار زينا بس أعملوا زينا و العالم كله هينبهر بيكم
حامد فيلة جميله.. بس زى ما قلت انا مش اتراكدت للأثار
اما الصوت والضوء فشفته فى الكرنك.. دا نكته هبقى احكى عليه لما اخدكوا الكرنك.. ماعلش استحمل بأه .. بردوا الكرنك فيه البحيرة المقدسة دى جميلة
---------
أيمن
هوا أنا لما بتيجى سيرة الفراعنة بحس بإنفصال رهيب بين العالم اللى كانوا عايشين فيه والعالم بتاعنا.. رغم ان الأرض واحدة والنيل واحد.. بس هما رعوا النيل واحنا بهدلناه
تعليقى علىحورس المقصود به جمال مبارك ياااااااااااااااه دا على كده اسرة مبارك قديمة اوى حتى كفاية بتاعة الفراعنه كانو عاملين حسابهم
ياااه .. اشمعنى يعنى معبد ادفو ؟؟ على فكرة هى بلدى الأصلى هاها ، بجد وهى اكبر مركز فى محافظة اسوان ... أما حورس الضخم ده فكنت دائما اسميه " العصفورة الكبيرة اللى هناك دى "
و لى صور تحته أنا عمرى سنتين فقط ... ثم صور أخرى بعد ان صار عمرى ثلاثين سنة
أما صدفة غريبة صحيح
و بخصوص المداخل الضخمة و الغالية جداً و كذلك الأسقف ، افتكرت إني قرأت من فترة طويلة بحث يثبت أن هذا دليل على أن قدماء المصريين كانوا عمالقة ، فمن الطبيعي أن منازلهم و معابدهم ، و صورهم التي على جدران المعابد تكون بكل هذه الضخامة .
Post a Comment
<< Home