إشكالية المقاطعة
كتبت: مريم
شخصيا توقعت مقاطعة القضاة للانتخابات . إنما النتيجة جت مختلفة و أعلن القضاة موافقتهم" المشروطة" على الإشراف على الانتخابات وكلمة "المشروطة" كانت غامضة و غير مفهومة و هو ما دعا مذيعة قناة الجزيرة امبارح لسؤال هشام البسطويسى عن جدواها و هل معناها امتناع القضاة عن الإشراف مادامت شروطهم لم تنفذ
أوضح البسطويسي إن قرار القضاة هو قبول الإشراف على الانتخابات ، و لما سألته المذيعة تاني عن سبب إشرافهم على انتخابات مشبوهة
واحتمال التزوير فيها عالي، قال إن السبب رغبة القضاة في متابعة الانتخابات لكشف الحقائق بعدها للناس، زي ماكشفوا قبل كده في تقريرهم عن تزوير نتائج الاستفتاء بتاع تعديل الدستور
يعني القضاة ماقالوش مش لاعبين زي ماعملت كفاية و أحزاب المعارضة، لأ طوروا موقفهم بحيث يفضلوا فاتحين كل الجبهات وماسكين خيوط اللعبة. بصراحة موقف القضاة حسم إشكالية مقاطعة الانتخابات أو المشاركة فيها. رأيي إن المشاركة دلوقتي في الانتخابات بقت واجب بجد-مش الواجب اللي قال عليه الطنطاوي في خطبة الجمعة اللي فاتت
عندي دايما إيمان و يقين معين-ممكن يكون طفولي- إن الناس مش هتتحرك و تنزل الشارع و تدافع عن حقها إلا لو شاركت في الانتخابات و ادت صوتها لمرشح بعينه عشان في الاخر تلاقي واحد تاني كسب. ساعتها بس الناس ممكن تتحرك لأني هبقى عارفة إن صوتي و صوتك اتزوروا، و احنا دلوقتي في وقت تاريخي فعلا لأن الناس كلها طهقانة بجد. الناس في دمياط و راس البر كانت بتسب و تلعن في اليوم اللي مبارك راح يزورهم فيه بسبب وقف حالهم من صباحية ربنا عشان "فيه تشريفة". إنما طول ماحنا ساكتين و قاعدين في بيوتنا على أساس إنها خربانة خربانة و الانتخابات هتتزور هتتزور مافيش حاجة هتحصل. ازاي إنت ممكن تثور و تغضب عشان تزوير الأصوات و إنت مانزلتش تدي صوتك من أصله؟
بلاش دي. إذا كنا فعلا عايزين ندعم القضاة و نقف وراهم يبقى ننزل نشارك بقى في الانتخابات و نديهم حاجة يشرفوا عليها بشكل مستقل زي ماهم عايزين، بمعنى إنهم بالتعاون مع منظمات المجتمع المدني هيراقبوا عملية التصويت بشكل مستقل و يطلعوا تقرير في النهاية يقول الحقيقة. طبعا اللي طلع بطايق انتخابية طلع من زمان و اتقفل الموضوع، إنما الشباب اللي من مواليد 82-86 و اللي مشتريين منهم شوية بيحطوهم ديكور ورا مبارك في كل خطاباته الانتخابية ممكن يعمل فرق لو نزل يدي صوته حتى لو اتزورت الانتخابات-لأن فيه اللي هيكشف ده بعد كده
النظام هيكسب لما يقعدنا في بيوتنا و يلعب لوحده. مهم أوي عندهم حالة السلبية و اليأس اللي عند معظم الناس لأنها ببساطة بتمرر قوانينهم و ألعابهم القذرة و بتخلينا نفقد الثقة في نفسنا على أساس إننا شعب مات .ليه مانتحركش و ننزل ولو حتى على أمل واهي جدا إننا ممكن نغير بجد نتيجة الانتخابات؟ ليه حتى مانتحركش على أساس التحدي لفساد النظام ورغبته في تهميشنا و تزهيقنا؟
أنا عن نفسي قررت أروح أدي صوتي لأيمن نور-زي ما قلت قبل كده- عشان برنامجه الانتخابي. إنما حقيقي لفت نظري جدا في أحاديثه خاصة في برنامج العاشرة مساء على دريم 2 قدر ثقته بنفسه و أمله في الفوز واللي اعتمد فيهم على إحساسه بتأييد الناس في جولاته. جايز حد يقول دي مناورة عشان يدي الناس إيحاء بالثقة و ما يطلعش مهزوز؟ جايز بيلبس صورة البطل؟
الأراء و الجدل حول نور كتير، بس تظل فكرة الأمل.. و الرهان على الناس بالثقة دي.. والإيمان بإرادة الفعل عند الشعب المصري بالشكل ده محل احترامي و تقديري
posted by Ghada @ 5:41 AM
8 Comments:
يمكن مش صوتي أنا اللي هيفرق
بس ده حقي و لازم أمارسه
و لازم الواحد يكون إيجابي بقى
كفاية سلبية
كلام سليم مهما كان الجدل حولين نور المهم مبداء تداول السلطه
والراجل قال انه رئيس فترة انتقالية تنتهى فى 2007 طب كويس هو ده المطلوب لما تنتهى الفترة احنا حريين بقا انشا الله نجيب شعبان عبد الرحيم الدستور حيكون تغير وكل شئ بقا تمام
وطبعا ازاحة من جاء باصواتنا اسهل بكتير من ازاحة الصنم
باتفق معاكي يا مريم.. وعجبتني نبرتك الحماسية اللي مش بتفتر أبدا اللي حسيتها في كلامك دي..
وطالما احنا قاعدين ننظر ونقول مش عاوزين ده وعاوزين ده .. يبقى ننزل نوريهم نفسنا ونوريهم إننا كتير .. نوريهم إن فيه ناس عاوزة حاجة تانية مختلفة عن الكام كومبارس بتوع الحملة الدعائية بتاعة مرشح الوطني ..
(شفتوه لما كان بيشتكي إنه مش واخد حقه كفاية في الظهور الاعلامي..)؟
أنا كمان شايفة إن نور مناسب.. أحسن الوحشين على الأقل..
معاكي حق يا مريم ، أنا بتمنى فعلاً إن كل الناس يشاركوا بكره ، ونفسي حتى اللي معندوش بطاقة انتخابية ومش متقيد في القوايم يروح ويتفرج الموضوع ماشي إزاي و إيه الخطوات اللي بتتعمل ، ده حاجة بتحصل مرّة كل 6 سنين ..
بس في الحقيقة أنا مش ناوي انتخب نور بكرة إن شاء الله ..
هروح أدور بقى عن بطاقتي الانتخابية عشان مش فاكر حطتها فين بالظبط من أيام تعديل الدستور ..
:)
بروفة لطيفة لممارسة الديمقراطية.. حتى لو ماجتش المرة دي، الانجاز الحقيقي هو إن الناس تعرف إن فيه إمكانية لزحزحة اللي قاعد على الكرسي الكبير. ربنا يستر من الأيام الجاية!
عزيزي عمر المختار ، المهم إنك متكسلش تطلع البطاقة الانتخابية وتقول لسة بادري وفاضل 6 سنين ، الموضوع سهب ومش هياخد منك حاجة ، من أول شهر 11 ممكن تعملها في قسم الشرطة اللي جنب البيت ،تاخد معاك صورة من البطاقة الشخصية مش أكتر ، مش هتدفع و لا مليم غير جوز جنيهات من باب الأخوة للكاتب بتاع القسم ، متكسلش و إلا هتيجي بعد 7 سنين و تقول خليها 2017 أحسن !
أدباتي (معلش علة السؤال السخيف ، بس إنت بنت و لا ولد) ، مبسوط إن فيه حد قدر يقرا كل البرامج الانتخابية و يكسر موضوع إن فيه 3 مرشحين بس ويتشجع ويدي صوته لواحد يعتبر اسم جديد ..
يا ريت تحكيلنا ليه العجرودي بالذات في يجعل كلامنا خفيف ..
انا على مقاطعتى للانتخابات لانى عارف الكوسة اللى كانت حاصلة انا اتحكى لى العجب ( على فكرة يوم الانتخابات كان البحر خالى من الحزب الوطنى تمام لدرجة ان أول مرة أشوف سمك فى البحر) طبعا دا من شدة صفاء المايه
نرجع لموضوعنا حكى لى صديق ان فى البلد كانو بتوع المحليات وليس القضاة فى بلدنا البالغ تعدادها 9 الاف شخص انه ماكنش فيه قضاة موجودين المهم مش حنختلف يدخل الواحد عاوز مين يا حج فلان الفلانى وبتاع المحليات يعلمله على الهلال وهكذا دا بالنسبة للناس العادية
اما المدرسين والعاملين فى الوظائف الحكومية فمعظمهم ادى صوته لحسنى
المصانع والشركات
فى طريقى من اسكندرية للمنوفية وعودتى للجيزة ما شفتش غير مئات او الاف اليفط لحسنى ( دا بس من محبيه ) !!!! ولم أر سوى يافطة واحدة لنعمان جمعة ودى تبع الحزب كمان مش واحد اللى عاملها له فمعروف ان العملية نصب من الاول ولا عزاء للقضاة ولا غيرهم
والنتخابات دى كانت لازم تتقاطع و تتاجل على الأقل سنه كمان علشان كل مرشح ياخد فرصته مش سمك لبن تمر هندى زى اللى حصل
والاشراف يكون قضائى كامل مش حسب التساهيل ولا ال 30000 الف المكافأة هزو القضاة يعنى الموضوع مطبخ ومسبك من زمان بس احنا اللى نايمين
Post a Comment
<< Home