لماذا ندون؟

لما تقابلنا ع الهوا يوم السبت اللي فات مريم ونور ودعاء وحامد وأنا، شفنا بعضنا في وشوش بعض، وحسينا إننا كلنا جايين من مكان واحد.. كنا عارفين بعض.. بنشَّبه على بعض وبنشبه بعض في ذات الوقت. جو الحوار كان صحي، وبالرغم من إني ماتكلمتش كتير، إلا إني كنت مستمتعة بالجو العام جدا.. وفضلت إني اراقب حماسة الكل وردود أفعالهم بفضول.

وطبعا لإن مجموعة "مصر مش كده" مقدرتش كلها تحضر اللقاء الإذاعي الجميل ده، ولإننا فعلا افتقدنا بنت مصرية وشادي وكينج توت وناس تانية كتييييير (بالمناسبة اتبسطنا جداااا من مكالمتك يا رومانتيك روز)، ولإن فيه موضوع مهم اتطرح في الحلقة على عجل، فكرت إني أفتح معاكم الموضوع ده تاني عشان نتكلم فيه باستفاضة أكتر..

"لماذا ندون؟" ..
السؤال على قد ما يبان سهل بسيط وأمور، إلا إنه مش سهل خالص، لإن عند كل واحد فينا تفصيلته الخاصة، ودوافعه الخاصة برضة اللي بتخليه يدون. وفيه فعلا مدونين ابتدوا يعملوا دراسات على المدونات والمدونين زي اندهاش، وغاندي مثلا. يعني باختصار الموضوع كبير..

التدوين بالنسبة لي بيعمل توازن ما.. على المستوى الشخصي بيحسسني إني مش بعيدة عن نوعية الكتابة اللي باحبها (الكتابة بمزاجي في أي موضوع من غير تكليف مسبق)..

كمان كنت مفتقدة جدا فكرة الانتماء لـ"كيان" ما.. اتحاد الطلاب والأسر والكلام العجيب بتاع أيام الجامعة ده، كان بيتعمل من منطلق "شللي" بحت ده غير إنه ماكانش حقيقي .. ده حتى العيال بتوع اتحاد الطلاب بينجحوا بالتزكية ومحدش بيعرفهم ولا يسمع لهم حس طول السنة (جو صحي جدا للتعليم!)..يعني ماكانش فيه أي احساس بالمشاركة أو بإن رأيي فعال أو هيأثر أو هيغير أو –أضعف الإيمان- إن حد هيسمعه من الأساس. كمان كان فيه احساس بالغربة، في العالم الحقيقي (اللي هو مش افتراضي) .. نظام أنا لوحدي اللي بفكر كده أو –على رأي سكار في فيلم الأسد الملك- "أنا محاط بشلة من الأغبيا!" .. وده اتحل لحد كبير..

وعلى المستويات التانية.. فكرة التواصل والنقاش بحرية من غير رقابة في حد ذاتها انجاز.. ماعتقدش إن كان عندنا أي ثقافة عن معنى الحوار كمان أو ضوابطه أو حتى التعبير عن الرأي في بيوتنا أو في الاطار التعليمي اللي تبعناه كمان (لو حد عنده رأي مختلف يا ريت يقول لي). وهنا كمان باحس إني مش مغيبة.. بمعنى إني حاسة ولامسة اللي بيحصل في البلد وشايفاه في عيون الناس وفي مدوناتهم وشايفة مدى تأثير الاحداث علي البشر..مش باقراها على إنها مجرد أخبار في سطر بيجري بسرعة في آخر الشاشة..

يعني ... ده اللي جاي على بالي دلوقت، يا ترى إنتم لو جاوبتم على السؤال هتكون اجابتكم إيه؟

محجبة? يبقى بلاش تتجوزي..

فضفضة: أميرة


من سنة وشوية ربنا رزقني بالعمل في المجلة الإلكترونية دي ومن حظي "اللطيف" اتطلب مني إني أكون مسئولة عن باب إسمه "قمر 14" وطبعاً واضح من الإسم إنه موجه للبنات اللي "قمر "14 أو للبنات إللي مش "قمر 14" ونفسهم يبقوا "قمر "14.. المهم... بما إن سياسة المجلة بتقوم على تدليل القاريء وتدليعة والاستجابة لأي طلب من الطلبات.. والإجابة عن أي سؤال مهما كانت سذاجته وغباؤه.. فكان لازم أهتم من -أجل لقمى العيش طبعاً- بطلبات الآنسات والسيدات الجميلات..

المشكلة بقى إنه اتبعت لي أكتر من خمسين إيميل البنات بيطلبوا فيها فساتين فرح للمحجبات.. وأنا عملت فيها الخبيرة بشئون البنات وقلت دي سهلة.. وبدأت أدور بمنتهى الثقة على النت عن أي مصدر بيتكلم عن المحجبات وبدأت رحلة البحث على google العزيز باللغة العربية "حجاب" مفيش "محجبة" لا حياة لمن تنادي... بدأت أقلق.. حاولت مرة واتنين ومليون وبعد ما فقدت الأمل قلت من باب الغلاسة أشوف حظي مع بلاد الفرنجة واستخدمت لغة الخواجات وكانت النتيجة مش مبهرة للدرجة بس على الأقل في نتيجة... وشوية وظهرت النتيجة المبهرة بعد البحث باللغة التركية اللي مليش أي علاقة بيها بس جت معايا كده بالشبه وعملت عدد نال اعجاب الجماهير..

المشكلة يا جماعة لما واحدة تبعت لي وتقول أنا محجبة شكلي كده حاقلع الحجاب في الفرح علشان مش لاقيه موديل شكله حلو.. طبعاً الكل في البداية حيشتم فيها بس لو فكرنا شوية - مع اختلافي الشديد معاها- حنلاقي إنها معذورة.. آه معذورة لما يكون كل المحلات بتعرض الفساتين مفتوحة شكلها تحفة وبعدين تعرض عليكي إنها تقفل الفستان ويطلع في الآخر الفستان شكلة "مرقع" أو شكله "جلابية" أو متقفل "بقماش شفاف" قلته أحسن..مش برضه تبقى معذورة إن دماغها تميل لقلع الحجاب.. ولما ميكنش في ولا موقع ناطق باللغة العربية بيعرض أي تصميم للعروسة المحجبة وكل علاقتهم بالمحجبات هي شوية عبايات كئيبة تنفع جدتي ولما تكون المحلات المخصصة للمحجبات اللي مالية المولات بتبيع الإيشارب الشفاف اللي لسه عايز إيشارب تاني تحته بـ150 جنية وأكتر.. مش برضه ممكن تقول أهي ليلة وتعدي...؟!!

أنا مش بادعو البنات إنها تقلع الحجاب يوم فرحها وأنا شخصياً محجبة ومعتزة جداً بحجابي بس بجد مش حاجة تحرق الدم لما نكون بلد "مفترض" إنه إسلامي وفي وطن "مفترض برضه " إنه إسلامي ومع ذلك العروسة متلاقيش حاجة تلبسها يوم فرحها؟!!

عاش الملك .. عاش الملك !
(عشان الملك بتاعنا مبيموتش ..)

يشاكسكم:حامد
على الرغم من أن نتيجة الانتخابات الرئاسية كانت محسومة من البداية ، إلا أنني لن أخفي عليكم اني شعرت بإحباط شديد بعد إعلان النتيجة ، ربما لنسبة المشاركة الضئيلة التي لم أتوقعها ، وربما لأنه قد خطر على بالي أن الانتخابات الرئاسية المقبلة ستكون بعد 6 سنوات كاملة ، وسيكون عمري حينها 28 سنة ، إذا كنت مازلت على قيد الحياة أصلاً ، وبالطبع استبعدت أن يسافر ولي النعم رحلته الأخيرة قريباً لأنه كأي مبيد محترم ، يتوغل و ينتشر و يستمر و يستمرو يستمر ...

على أية حال فهناك بعض الظواهر التي رأيتها يوم الانتخاب و أراها جديرة بالمناقشة ، على راسها بالطبع قضية الأميين الذين لا يعرفون شيئاً عن الليلة إلا رمز الهلال ، والذين رأيت اطناناً منهم يجلبهم الحزب بحكم أن لجنتي الانتخابية تقع في منطقة شبه ريفية ، الأمر الذي جعلني افكر بطريقة شريرة بعض الشئ ، هل معنى الديموقراطية أن من حق أي بصمجي أن يدي بصوته .. فعلى اي أساس أو معرفة سيختار ، أنا لا أقصد بالطبع أن البسطاء و الأميين مرتشون باعوا القضية ، المشكلة أنهم لا يعرفون أن هناك قضية اصلاً ، فما رأيكم في أن يكون هناك حد أدنى من التعليم لا يجوز للمواطن ان يصوت بدونه ، يبقى على الأقل بيفك الخط حتى !

وصفته دعاء
إشارات...
كلكسات...
حكايات...
شخطات...
دوامات...

ازدحم كل ذلك في الطريق.
لاحتْ لي من بعيد...
اقتربتْ
.........
"على جنب يا أسطى"
شقتْ طريقها مندفعة بقوة حتى أسكنت الضوضاء وعلت سقف الزحام.
هكذا خرجت.

نزلتُ بعد أن قررتُ فجأة أن أدخلها... تلك التي لاحت لي من بعيد، وتلوح دائماً فيّ لي من على قرب ملتصق. تلك التي هي كلية الآداب بجامعة القاهرة.

انطلقتُ وخلفي قدمي وشنطتي وطرف طرحتي الطائر يحاولون اللحاق بي دون جدوى.
دخلتُ.. فرملني خوف وشوق وقلق.. ولم أستطع أن أسألني ما الذي تفعلينه؟
وعلى أي أساس دخلتِ؟
لقد تخرجتِ وقد انقضى على تخرجكِ عامان....؟؟!!

تن، تن، تن، تن، تن، تن
دقت ساعة الجامعة دقاتها المميزة التي تجعل للساعات معنى وصوت ولون ورائحة. عادني انطلاقي وهللتُ لما وجدتُ ساعتي مضبوطة على ساعة الجامعة.

لحقتْ بي قدمي وهي تلهث وتنتفخ، فترفقتُ بها وأبطأت حتى تلازمني. انخرطتُ في الجموع الملونة وإن كنت لم أكن أرى إلا أنا والكلية.

وقفتُ أمام مبنى قسم اللغة الإنجليزية يبن الشجرتين المتصدرتين لمدخله. بسطتُ عليه بصري وروحي ببطء منتشي من عتبته حتى أعلاه المتماس مع نظير له في السماء.

مررتُ على شبابيكه الشيش الخضراء، ففتحتُ المغلق منه وأطللتُ من المفتوح. شعرتُ أن قامتي قصيرة لما لم يفدني طولها فشببتُ لأرى العقد الزخرفية في زواياه.

انفتحتُ بداخلي المحاضرات والسكاشن على بعضها: مدرج 74، 13، 78، ورووم 14، 15، 16 والـ Lab.. د.عبد العزيز حمودة وهو يشرح "الملك لير" وينفعل حتى يصل للآداء المسرحي، إيوجينيا وهي تنزل من الكارتة في سمو متصنع لمقابلة أقاربها الأمريكان، د. أحمد الشامي وهو يستحثنا للبعد عن النمطية في التفكير، د. شيرين أبو النجا لما يعلو صوتها وهي تقرأ قصيدة رومانسية فأرى فيها الجدول والشجر، "ماجي" لما كانت تصعد إلى العلية غاضبة لتبكي وتكلم عروستها وتضرب الأرض بقدميها اعتراضاً على القيود المفروضة، "كييتس" وهو يغني لـ"برومثيوس"، "وليام وردزورث" وهو يتجول وحده كسحابة...
سحبوني لداخل القسم لأتجول وحدي كسحابة.

- هنا... عاتبني د. علي عبد العزيز لأني أنقصت نفسي درجتين لأني بخلت على المقالة بقليل من الكثير الموجود في جعبتي كما قال..
- هنا ... بكيت لما أغرقت ماجي نفسها.
- هنا... ضحكنا مع د. آمال مظهر على ديدي -لست أنا- وجوجو في انتظار جودو.

قاطعني اللون العاجي الزاهي على الجدران.. لم أعتده زاهياً طرياً، بل معتقاً راسخاً.
أردكت أنهم يعيدون طلاء القسم من الداخل. تلبسني خوف وغضب لو كانوا قد غيروا اللون وبطنوا القسم بحلة معدنية زجاجية لا معنى لها بدلاً من الخشبية الحجرية الأصيلة المفعمة بكل من\ما مر\وا بها. حمدت ربنا لما رأيت أنهم تحركوا فقط في مساحة درجات اللون حركة ضيقة في لون الجدران وحركة أوسع قليلا في لون الأبواب فظل الطابع كما هو.

دخلت مدرج 13 على أمل أن يكونوا قد أصلحوا الساعة الرابضة فوق السبورة.. لم يحدث.
مازالت تشير إلى الحادية عشرة كما كانت طوال سنوات دراستي.
وفجأة، اتسعت الرؤية لأجد د. عبد العزيز حمودة أمامي. سلمت عليه وقلت له إني تلميذة عنده. ضحك وسألني وماذا تفعل التلميذة الآن؟

وقفت في منتصف البهو الرئيسي وقد زال عني الخوف والقلق ولا يزال الشوق يطربني ويعيدني ويهزني.
هل اتسع المكان وكبر أم ماذا؟
أليس من المفترض أن يبدو أصغر بعد أن تخرجت وخرجت؟
خبطت على جبهتي..
يالغبائي...
فقد اكتشفتُ أني لم أتخرج، وأنه لم يمضِ عامان، وأني..
لا أزال صغيرة.